Украины Крымийн хойгт Оросын цэргүүд нэвтэрсний дараа дэлхийн удирдагчид хямралыг энх тайванч замаар шийдвэрлэх гэж чармайж байгаа билээ. Крымийн хойг дахь хямрал үнэн хэрэгтээ үзэл бодлын тулаан болж, хүйтэн дайны шинжтэй болж байгааг дэлхийн хэвлэлүүд онцолжээ. Орос, Украин, Америк гэсэн гурван орны удирдагчид тоглоомын хөзрийг гартаа атгасан байна.
Украиныг хэн удирдаж байна вэ?
НҮБ-ын ОХУ дахь төлөөлөгч Виталий Чуркин “Виктор Янукович албан ёсоор сонгогдсон ерөнхийлөгч мөн бол шинэ Засгийн газар хууль бус” гэж хэлсэн юм. Харин Украинчууд ирэх тавдугаар сарын 25-нд болох шинэ сонгуулиар хууль ёсны Засгийн газраа байгуулах учраас ажиллах боломж олгох хэрэгтэй” гэж Украины элч Юрий Сергейв хэлжээ. Харин АНУ Януковичийн бүрэн эрхийн хугацаа дууссан гэж үздэг юм.
Украинд Оросын хэдэн цэрэг байрлаж байгаа вэ?

Оросын эрх баригчид Украинд хичнээн цэрэг байрлуулсанаа мэдэгдээгүй юм. Тэгвэл Украинчууд Крымийн хойгт цэргийн усан онгоц, нисдэг тэрэг, ачааны онгоцууд болон 16 мянган цэрэг байрладаг гэж үзэж байна. Харин АНУ Оросын 6000 цэрэг Крымийг эзлэхийн төлөө тэмцээд эхэлсэн гэж үздэг.
Крымд Оросын цэрэг байрлах нь зөв үү?
Хөрш орнуудын хооронд байгуулсан гэрээний дагуу Крымд Януковичийн хүсэлтээр цэрэг илгээсэн гэж Оросууд мэдэгдсэн. Харин Украинчууд манай улсын хилийн ойролцоо цэрэг байршуулж, түрэмгий аашилсан гэж үздэг. Америкчууд Оросын ерөнхийлөгч Владимер Путин аюултай тоглоом тоглож байна. Цэргийн ажиллагааны улмаас Оросууд өөрсдөө хохирол амсана гэж үзэж байгаа ажээ.
Бүх хэргийн зангилаа яагаад одоо тайлагдаж байна вэ?
Төрийн Думаас зөвшөөрөл авсаны дагуу Путин Крым дэхь иргэдээ хамгаалахын тулд цэрэг ашигласан гэж Оросууд өөрсдийгөө зөвтгөж байгаа. Гэтэл Украины удирдагчид “Украиныг Оросууд заналхийлээгүй гэх баталгаа байхгүй. Оросууд Крымийг хүчээр өөртөө нэгтгэх гэж байна” гэж хэлсэн юм. Оросууд Украиныг Европын холбоо, Барууныханы нөлөөнд оруулахаас айсандаа түрэмгий аашилж байна гэж үздэг. Орос, Америк, Украинчуудын хэн нь зөв болохыг уншигч та тунгаана биз ээ.