Венесуэлийн ерөнхийлөгч Николас Мадуро Панам улстай дипломат харилцаагаа тасалж, эдийн засгийн хамтын ажиллагаагаа зогсоосон байна. Төв Америкийн Панам улс АНУ-тай Венесуэлийн хямралын асуудлаар уулзалт зохион байгуулах хүсэлт илгээсний дараа Мадуро ийм шийдвэр гаргажээ. Венесуэл улсад гурван долоо хоногийн турш үргэлжилж буй эсэргүүцэл, тэмцлийн улмаас 18 хүн амиа алдсан энэ үед Николас Мадуро Латин Америкийн бусад орны удирдагчдад хандан өмнөх ерөнхийлөгч Уго Чавесийн таалал төгссөний нэг жилийн ойг тэмдэглэн өнгөрүүлэх талаар ярилцжээ. Тус улсад инфляци дээд цэгтээ хүрч, өргөн хэрэглээний бараа тасран, гэмт хэргийн гаралт ихэссэнд жагсагчид бухимдалтай байна. Ийм хүнд үед бусад улстай хамтран Венесуэлийн дотоод хэрэгт оролцох гэж байна хэмээн Мадуро үзэж байгаа бол Панам улсын ерөнхийлөгч Рикардо Мартинелли найрамдалт харилцаатай улс нь ийм шийдвэр гаргасныг ихэд гайхан хүлээн авчээ. Венесуэлийн эрх баригчид одоогийн жагсаал тэмцлийг Америкчууд санаатай зохион байгуулсан гэж үздэг. Тиймээс ч оюутнуудтай нууцаар уулзаж, жагсаал хийхийг ятгасан хэмээн буруутгаж, Америкийн гурван дипломат ажилтныг хөөсөн билээ.