Хойд Солонгос өнгөрсөн мягмар гаригт ойрын тусгалт хоёр пуужинг харвасан гэж тус улсын Ёнхап агентлаг мэдээлсэн. Тэгвэл Хойд Солонгосын харвасан пуужин Хятадын иргэний агаарын тээврийн онгоцыг онох шахжээ. БНХАУ-ын Батлан хамгаалах яамнаас мэдээлснээр Хойд Солонгосын сануулгагүй харвасан пуужин “China Southern Airlines”-ийн “CZ628” чиглэлд нисч байсан онгоцны замыг дайран өнгөрч, “маш аюултай нөхцөл байдал үүссэн” гэжээ.

Хятадын батлан хамааглах яамны төлөөлөгчийн хэлэхдээ “Хойд Солонгосын энэ мэт өдөөн хатгасан үйлдэл нь олон улсын агаарын тээврийн үйл ажиллагаа болон энгийн иргэдийн аюулгүй байдалд аюул заналхийлсэн ноцтой үйлдэл” хэмээжээ.

Хятадын “Airbus 321” онгоц Японы Нарита нисэх онгоцны буудлаас Шэньян хотыг зорьж явах үед буюу 16:24 минутын үед Хойд Солонгосын пуужинтай ойрхон зөрж өнгөрчээ. Хойд Солонгос нь 16:17 цагт пуужин харвасан бөгөөд онгоцноос зургаан минутын зайтай зөрсөн байна. Тухайн үед Хятадын “Airbus 321” онгоцонд 220 зорчигч, нислэгийн багийн хамт зорчиж явсан аж.