ОХУ-ын Крымд хэрэгжүүлж байгаа цэргийн түрэмгийллийг зогсоох зорилгоор Европын холбооны удирдагчид Брюселль хотноо дээд хэмжээний уулзалт зохион байгуулжээ. Германы удирдагчдын санаачилсан энэ уулзалтаар хямралыг шийдвэрлэх огцом арга хэмжээ авахаас илүүтэй ОХУ-тай Украиныг эвлэрүүлэн зуучлахыг эрхэмлэж байсан билээ. Гэвч Крымийг ОХУ-д нэгтгэх асуудлаар бүх нийтийн санал хураалт явуулахаар болсон нь Украины үндсэн хуулийг зөрчсөн хууль бус алхам гэж Европын холбоо үзэж байна. Тиймээс Оросын удирдагчид хямралыг нааштайгаар шийдвэрлэх ямар нэгэн алхам хийхгүй бол Европын холбоо-ОХУ-ын дээд хэмжээний уулзалтыг цуцлах, визийн хориг тавих, эдийн засгийн хориг тавих зэрэг хатуу арга хэмжээ авах болно гэж анхааруулжээ. Их Британийн ерөнхий сайд Дэвид Камерон “Нөхцөл байдал хяналтаас гарч маш ээдрээтэй, тооцоолсоноос огт өөрөөр эргэж байна. Улс үндэстнүүд бие биенийхээ ашиг сонирхлыг уландаа гишгэж, тусгаар тогтнолыг нь үгүй болговол урт хугацаанд хямрал дагуулдагийг бид түүхэн сургамжаас мэднэ ” гэж хэлсэн байна.