Манекен буюу хувцас өмсүүлдэг амьгүй хүүхэлдээтэй гэр бүл болж хамтран амьдарна гэдэг хачирхалтай санагдаж байгаа биз. Гэвч Колорадо мужийн “Starz Entertainment” группын захирал Сюзанна Хайнз сүүлийн 14 жилийн турш нийлэг материалаар хийсэн хүүхэлдэйнүүдтэй нэг гэр бүл болж амьдарч байна. Тэрээр "гэр бүлдээ" Чаунси, Мари Маргерет гэдэг нэр өгөн нөхөр, охин шигээ ханддаг. Сүүлийн жилүүдэд тэд хамтдаа Америкийн хотуудаар 16 мянган километр газар аялж, аз жаргалтай үеийнхээ гэрэл зургуудыг мөнхөлжээ. 15 жилийн өмнө ээжийгээ алдсан Сюзанна аз жаргалтай гэр бүлтэй болно гэж өөртөө амласан гэдэг. Өнөөг хүртэл мөрөөдлийн аз жаргалаа олж чадаагүй тэрээр манекенүүдтэй хамт ихэнх цагаа өнгөрүүлдэг гэнэ. Сюзанна бүсгүйн энэ үйдлийг хүмүүс гайхаж, инээх зэргээр янз бүрээр хүлээж авдаг ч өөрөө өөртэйгээ ярилцаж амьдрах нь түүнд таалагддаг ажээ.
