Сирийн иргэний дайнд галт зэвсэгт өртөхөөс гадна өлсгөлөнгөөр амиа алдсан хүмүүс нэмэгдэж байгааг Эмнести интернэйшнл байгууллага шүүмжилж байна. Дамаск хотод байрлах Ярмук хуаранд 128 дүрвэгч өлсгөлөнгөөр нас баржээ. Ярмук хуаранд амьдарч буй 17-20 мянган иргэн хоол хүнсний гачигдалд орсоны зэрэгцээ мэргэн буудагчдын суманд өртөх эрсдэлтэй ажээ. 2013 оны дөрөвдүгээр сараас хойш гэрэл цахилгаангүй болсон энэ газар ихэнх эмнэлгүүд нь хаалгаа барьсан учраас анхны тусламж авна гэдэг тэнгэрийн од шүүрэхтэй адил зүйл болсон юм. Тиймээс Сирийн иргэний дайны золиос болсон хүмүүс муур, нохойны мах, өвсөөр хооллож, соёлт ертөнцөд байж боломгүй аймшигт нөхцөлд амьдарч байгаа хэмээн хүний эрхийг хамгаалагчид онцолжээ. Тиймээс хүн төрөлхтний эсрэг гэмт хэрэг үйлдэж буй дайныг зогсоохыг дахин сануулав. Ярмук хуаранд амьдарч байгаа хүмүүсийн 60 хувь нь чанартай хүнс хэрэглэж чадаагүй тул тэжээлийн дутагдалд оржээ. 1948 оны Араб-Израйлийн дайны үеэр босгосон энэхүү дүрвэгсдийн хуаран 2012 оны сүүлээс эхлэн босогчдын талын тулааны талбар болсон юм. Анх 180 мянган хүн энд дүрвэн ирсэн боловч 20 мянга нь өнгөрсөн оны сүүлээс эхлэн Засгийн газрын дайчдын хүчинд хавчуулагдан “хавханд” орсон мэт байдалтай болжээ. Өнгөрсөн сард Сирийн энхийн хэлэлцээрээр дүрвэгсдийг нүүлгэн шилжүүлэхээр тохиролцсон боловч Ярмук дахь нөхцөл байдал сайжраагүй байна.
