Украйны асуудлаар ОХУ-ын эсрэг худалдаа эдийн засгийн хориг тавихыг АНУ сануулах болсон. Гэвч Оросуудын эсрэг хориг арга хэмжээ авах нь АНУ болон барууныханд өөрсдөд нь хохиролтой тусах бодит байдал үүсээд байгаа билээ. Өрийн дарамтанд орсон АНУ, хямралын менежментээр ажиллаж байгаа Европын эдийн засагт Оросуудын хөрөнгө оруулалт тэр дундаа байгалийн хийн олборлолт ихээхэн нөлөөтэй болоод байгаа. Европын холбооны сайд нарын зөвлөл хуралдаж Оросын эсрэг хориг арга хэмжээ авах асуудлаар хуралдсан ч шийдвэр гаргаж чадаагүй. Дэмий л шаардлага тавьсан болоод өнгөрсөн. Харин АНУ Европын холбоо болон бусад хамтрагчдаа ОХУ-ын эсрэг эдийн засгийн хориг тавихыг шахаж байгаа ч тэдний оролдлого талаар болоод байна. Их наймын бүрэлдэхүүнээс ОХУ-г гаргах санааг Германы канцлер Анжела Меркель дэмжихгүй гэдгээ мэдэгдсэн бол Хятад улс Оросуудыг ганцаардуулах бодлогыг талд байхгүй гэдгээ илэрхийлээд байгаа. АНУ Оросуудын эсрэг дангаараа хориг арга хэмжээ авч, Путин болон эрх баригчдын АНУ, олон улсын зах зээл дахь хөрөнгийг битүүмжилж Оросын компаниудыг хувьцааг царцаах тухай мэдэгдсэн билээ. Харин Оросууд АНУ, Европын холбооны  энэхүү шахалтаас огтхон ч эмээхгүй байгаа төдийгүй Украйнд явуулж буй үйл ажиллагаа, Крымийн бүх нийтийн санал асуулгыг хууль ёсны гэж үзэж байгаа юм. Тэд хэрвээ АНУ, Барууныхан хориг арга хэмжээ авбал Москва ч зүгээр суухгүй гэдгийг сануулж, АНУ-ын хөрөнгө оруулалттай ОХУ-д үйл ажиллагаа явуулж буй компаниудын хөрөнгийг битүүмжилнэ гэж мэдэгдээд байна.