Малайзын иргэний агаарын тээврийн дарга Азхаруддин Абудал Рахман алга болсон онгоц оньсого хэвээр байгааг онцолжээ. Онгоцыг барьцаалсан учир алга болсон, далайгаас хэлтэрхийнүүд олдлоо зэрэг нь бүгд баталгаагүй болохыг мэдэгдсэн байна. Куала Лампур хотоос Бээжингийн чиглэлд нисч явсан 239 зорчигчтой онгоц алга болоод бараг гурав хонож байгаа юм. Эрлийн ажлыг зохион явуулж буй есөн орны 40 усан онгоц, 34 агаарын онгоц ямар ч улам мөр олоогүй байгааг анхаарууллаа. Вьетнамчууд онгоцны хаалга байж болзошгүй хоёр хэлтэрхий олдсон гэж мэдээлсэн нь үнэн хэрэгтээ газрын тосны өрөм байсан гэнэ. Онгоц сүйрсэн гэсэн ямар ч ул мөр олдоогүй учраас Бээжин хотын нисэх буудалд ойр дотны хэн нэгнээ хүлээж байгаа хүмүүст тайван байхыг зөвлөжээ. Боинг “777-200ER” онгоц хөөрөөд удаагүй байтал хяналтаас гарч алга болсон юм. Эрлийн багийнхан “Далайн уудам орон зайд нэг онгоц сагсан бөмбөгтэй адил маш жижигхэн харагддаг. Тиймээс ийм том орон зайд ямар нэгэн зүйл олж харна гэдэг хүндрэлтэй байна” гэж хэлжээ. Онгоц террорист халдлагад өртсөн байж болзошгүй гэж үзэн бүх талаас нь шалгаж байгаа ч нотолгоо олдоогүй ажээ.