Даваа гариг бүрт болдог “Бүтээн байгуулалтын цаг” уулзалтад Эрүүл мэндийн сайд Н.Удвал оролцож энэ онд салбартаа хийгдэх ажлуудын талаар танилцууллаа.

Тэрбээр  ”2013 он манай улсын хүн амын оргил өсөлтийн жил байлаа. Нас баралт, эхийн эндэгдэл, нялхсын эндэгдэл 2000 оноос хойш сүүлийн 14 жилийн хугацааны хамгийн бага түвшинд байлаа” гэж хэллээ.

Тус яам 2014 оныг “Эх, хүүхдийн эрүүл мэндийг дэмжих” жилээр зарлаж,  ялангуяа жирэмсэн эхчүүд, төрсөн эх, хүүхдийн асуудлыг хяналтдаа авч ажиллаж байна. Үүний үр дүнд энэ оны эхний хоёр сарын байдлаар өнгөрсөн оны мөн үеийнхтэй харьцуулахад нялхсын эндэгдэл 29 хувь, 5 хүртлэх насны хүүхдийн эндэгдэл 19 хувиар тус тус буурчээ.

Энэ оны 4 дүгээр сараас эх хүүхдэд үзүүлж буй тусламж, үйлчилгээний хүртээмж, чанарыг дээшлүүлэх, хүүхдийн эрүүл мэндийг  дэмжих жилийн ажлын үр өгөөжийг дээшлүүлэх зорилгоор Эрүүл мэндийн сайдын улсын үзлэгийг зохион байгуулахаар төлөвлөжээ.

Зайн оношилгооны тоног төхөөрөмжид оруулсан хөрөнгө оруулалт үр ашгаа өгч эхэлсэн. Зайн оношилгоог ашигладаг болсноор хөдөө орон нутгаас Улаанбаатарт оношилгоо, эмчилгээний зөвлөгөө авахаар ирдэг байсан 10 хүний гурав нь л ирэх шаардлагатай болсон гэж Эрүүл мэндийн сайд хэллээ.

11 аймгийн төвд компьютер томографийн аппарат, дижитал рентген аппарат, лабораторийн болон дурангийн оношилгоо, эмчилгээний тоног төхөөрөмжүүд, чих хамар хоолой, эрүү нүүр, шүдний оношилгоо эмчилгээний тоног төхөөрөмж бүхий Оношилгооны төв байгуулагдаж байна. Өнгөрсөн онд эрүүл мэндийн төв, эмнэлгийн зориулалттай 18 барилга ашиглалтад орсон бол энэ онд 32 барилга ашиглалтад орно. Үүнд Завхан, Говь-Алтай аймагт төрөх эмнэлэг, Баянзүрх дүүргийн 150 ортой төрөх эмнэлэг, Архангайд эхийн амрах байр зэрэг багтжээ.

Манай улсад эмчилж оношилж чадахгүй байгаа 33 өвчин бий. Эдгээр өвчин эмгэгийг эх орондоо оношилж эмчлэх ажлыг эхлүүлнэ гэж сайд хэллээ. Дотоодын нөөц бололцоондоо тулгуурлах, гадаадаас нарийн мэргэжлийн эмч ажилтнуудын баг ажиллуулахаар төлөвлөж байна. Иймд гадаадад эмнэлгийн тусламж авахаар хүлээж байгаа болон хандаж чадахгүй байгаа хүмүүсийг өнөөдрөөс Эрүүл мэндийн яаманд бүртгэж эхэлжээ. Бүртгэлийг www.chd.moh.mn цахим хаяг болон 7012 8807, 93137804, 98648801 гэсэн утсаар авч байгаа аж.

Эрүүл мэндийн яамнаас 2014 оныг “Эх, хүүхдийн эрүүл мэндийн жил” болгон зарлаж, улс орон даяар аян өрнүүлж эхлээд байгаа аж. Энэ хүрээнд зохион байгуулах хороо байгуулж, долоо хоног бүр хуралдан,  тулгамдсан асуудлуудаа ярилцаж байгаа гэнэ. 2014 оны эхний хоёр сарын байдлаар 0-1 насны хүүхдийн эндэгдэл 29 хувь, тав хүртэлх насны хүүхдийн өвчлөл 19 хувь хүртэл /өнгөрсөн оны мөн үеийхтэй харьцуулахад/ буурсан үзүүлэлттэй байгаа аж. 2014 онд Монгол Улс гурван сая дахь иргэнээ хүлээж авах тооцоо гарч учраас эрүүл мэндийн салбарынхан эх, хүүхдийн эрүүл мэндэд илүүтэй анхаарч, эндэгдлийг бууруулахаар зорилго тавин ажиллаж байна.

ЭХЭМҮТ-д өнгөрсөн нэгдүгээр сард Удамзүйн лаборатори шинээр ашиглалтад орсноор ургийн гажиг, генийн өөрчлөлтийг эхийн хэвлийд нь оношлох боломжтой болжээ. 2014 оны эхний хоёр сарын байдлаар нийт 11 төрлийн 85 гажиг хүүхэд төржээ. Ургийн гажигтай хүүхдүүдийн 50,6 хувь нь орон нутагт, 49,4 хувь нь нийслэлд төрсөн байна. Ургийн гаж хөгжлийг эхийн хэвлийд оношилж, эмчлэгдэх боломжгүй эмгэгтэй тохиолдолд эцэг, эхийн хүсэлтээр жирэмслэлтийг зогсоодог юм байна.