Гадаад харилцааны сайд Л.Болд НҮБ-ын Аюулгүйн Зөвлөлийн байнгын гишүүн болох АНУ, БНХАУ, Бүгд Найрамдах Франц Улс, ИБУИНВУ, ОХУ-аас тус улсад суугаа Элчин сайд, хэргийг түр хамаарагч нарыг өнөөдөр хүлээн авч уулзлаа.
Сайд Л.Болд Монгол Улсын цөмийн зэвсэггүй статусыг дээрх таван гүрэн хүлээн зөвшөөрч, статусыг хүндэтгэх төдийгүй түүнийг зөрчих аливаа үйлдлийг үл дэмжихээ амлаж 2012 оны 9 дүгээр сард Хамтарсан тунхаглал гаргасанд Монгол Улс талархаж байгааг илэрхийлжээ

НҮБ-ын Ерөнхий Ассамблейн энэ оны намрын чуулганаар Монгол Улсын олон улсын аюулгүй байдал,  цөмийн зэвсэггүй статусын тухай НҮБ-ын ЕНБД-ын илтгэлийг хэлэлцэж уг асуудлаар тогтоол батлан гаргах юм. Тэрхүү тогтоолд таван гүрний Хамтарсан тунхаглалын үзэл санааны дагуу Монгол Улсын өвөрмөц статусыг албан ёсоор хүлээн зөвшөөрсөн заалт оруулах саналтай байгаа, энэ талаар монголын тал эдгээр таван гүрэнтэй хамтарч ажиллах сонирхолтой байгааг сайд Л.Болд мэдэгдээд энэ тухай санамж бичгийг тэдэнд гардуулав.

Цөмийн зэвсэгтэй таван гүрэн Монгол Улсын энэхүү өвөрмөц статусыг хүлээн зөвшөөрсөн боловч түүнийг зарим бусад улс орон прецедент болгон ашиглаж магадгүй гэж үзэж Ерөнхий Ассамблейн тогтоолд статусыг хүлээн зөвшөөрсөн тодорхой заалт тусгахыг дэмжиж байгаагүй юм.

Уулзалтын үеэр сайд Л.Болд элчин сайд, хэргийг түр хамаарагч нартай олон улсын болон бүс нутгийн  харилцан сонирхсон бусад асуудлаар санал солилцлоо.