Монголын хамгийн том групп компанийн тоонд ордог "Бодь" группийг “нүгэлтэн” гэж цоллов. Энэ үгийг Ерөнхийлөгчийн Тамгын газрын дарга П.Цагаан гуай хэлсэн бөгөөд ингэж дуудах болсон шалтгаан нь ч бас учиртай аж. Саяханыг хүртэл АН-ын нөлөө бүхий улс төрчдийн хамтын эзэмшилд байсан "Бодь" групп нь хүүхдийн паркийн хувьчлалд оролцсоныхоо эцэст хууль бусаар газар эзэмшсэн гэх хэргээр шүүх, цагдаагийн байгууллагад дуудагдсан. Тус газрын маргаантай холбоотой хэрэг шүүхээр хоёр жил яваад “Бодь” группийн талд шийдэгдсэн ч тэднийг паркийн газрыг хууль бусаар авсан гэж буруутгах хүмүүс одоо ч байна.

Түүх сөхвөл Хүүхдийн паркийн газрыг “Бодь”, “МCS”, “Мон уран”, “Сөүл” ресторан зэрэг бизнесийн томоохон компаниуд хувааж авсан байдаг. Хүүхдийн парк 1966 онд ашиглалтанд орох үедээ 35.6 га газартай байжээ. Одоо бол тоглоом барьж тохижуулсан газар нь есхөн га. Харин 26 га нь юу ч үгүй хоосон балгас шиг болж, долоон га газарт нь хувийн компаниуд барилга барьсан байна. Үүний 76 хувийг нь “Бодь” групп дангаараа эзэмших эрхтэй. Харин үлдсэн хэсгийг нь дээрх нэр дурдсан компаниуд хувааж авчээ.

Ямартай ч паркийн газар хуваагдаж, хувийн өмч болсон түүх товчхондоо ийм. Тэгвэл үүнийг “Монголын залуучуудын холбоо” эсэргүүцэж “Паркаа аваръя” хөдөлгөөнийг нэг жилийн өмнө өрнүүлсэн.

Тэдний үзэж буйгаар “Бодь” групп нь паркийн 4/1-д нь тоглоом байрлуулчихаад үлдсэн 4/3-д нь байшин барьж ашигласан аж. Энэ нь паркийг үгүй хийх гэсэн оролдлого хэмээн тэд үзэж байгаа. Тиймээс ч тус газрыг хүүхдийн соёл амралтын хүрээлэн хэвээр нь үлдээе гэсэн асуудлыг улам эрчимтэй өрнүүлсэн билээ. Цаашлаад уг ажил нь нилээн өндрөө авч Ерөнхийлөгчийн тамгын газарт хүрч, хэлэлцүүлэг хүртэл зохион байгуулсан байдаг. Хэлэлцүүлгийн үр дүнд “Бодь” группийг шүүхэд өгч шалгуулжээ.

Ингээд хэрэг шүүхийн байгууллагаар яг шийдэгдэх үед “Бодь” группийн зүгээс “Бид паркид 30 гаруй тэрбум төгрөгийн хөрөнгө оруулалт хийсэн. Бүх тоглоомыг шинэчилсэн. Галзуу хулгана нэмж байрлуулсан. Паркийг зөвхөн зуны цагт ашиглаад өнгөрч болохгүй. Харин өвлийн паркийг зочид буудалтай хамт барьж байж ашиг олно” гэж хэлэн аргалаад гурван шатны шүүхийн шийдвэрийг өөрсдийн талд гаргажээ.

Харин П.Цагаан гуай энэ талаар хэлэхдээ “Парктай холбоотой хүмүүсийг хараад байхад зарим нь зүгээр аваад хадгалсан юм гэж байгаа. Тэгвэл тэр хадгалсан хүмүүс нь өгчих хэрэгтэй. Зарим бие биетэйгээ барьцаад байгаа нөхдүүд бол сайн санаагаар буцаагаад өгчих хэрэгтэй. Нөгөө хэсэг болох үнэхээр орон зайг нь багасгаад байшин барьчихсан нөхдүүд бол нүглээ наминчилж, хэр хэмжээгээр хүүхдүүдийн тоглох наадах чөлөөт цагаа зев боловсон өнгөрүүлэх орон зайг үгүй хийсэн, тэр хэмжээгээрээ өөр хүүхдүүдийн эрх ашигт нийцсэн зүйлд хөрөнгө мөнгө зарж юм барьж бүтээж өгөх хэрэгтэй. Хуулийн асуудал бол нэг асуудал. Түүний хажуугаар аливаа зүйлд ёс зүй гэж байдаг. Нүгэл хилэнц гэж юм бий. Ингэж нүглээ наминчлахыг хүүхдүүд, нийгэм сэтгүүлчид шаргуу шаардах хэрэгтэй гэж бодож байна” хэмээн ярив.

Тэрбээр мөн тус компаниудад газар өгсөн тухайн үеийн нийслэлийн удирдлагуудыг уг хэрэгт хамгийн их буруутай хэмээн хэлж, хариуцлага тооцох ёстой гэдгээ ч дуулгаад авлаа.

Нэг намын угшилтай “Бодь” группийнхэнийг нүглээ наминчлах ёстой гэж хэлсэн түүний үг Ерөнхийлөгчийн ч санаа байж ч болох талтай. Мөн түүний энэ үг бизнесийн ашиг сонирхол зөрчлийг илэрхийлж байна уу, эсвэл паркийг  үнэхээр аврахгүй бол утсаж үгүй болох гээд байна уу гэдэг асуудлыг араасаа дагуулж байна. Нөгөөтэйгүүр паркийг менежмэнтээр хувьчилахад МАН нийслэлийн Засгийн эрхийг барьж байсан. Гэтэл АН Засгийн эрхэнд гарч ирэнгүүтээ М.Зоригт, Л.Болд зэрэг намынхаа гишүүдийн олон асуудлыг олонд ил болгож гаргаж тавьсан нь тус намынханы хоорондын зөрчил ч гэж үзэх хүмүүс байгаа юм.

Ямартай ч Ерөнхийлөгчийн Тамгын газрын байр суурь ийм байна. Тэгэхээр одоо тэдний хэлсэнчлэн "Бодь" групп нүглээ наминчлах л үлдэж байна.