Улсын Ерөнхий прокурор Х.Дорлигжав хууль зүйн сайд Х.Тэмүүжингийн эхлүүлсэн шинэчлэлийг багагүй шүүмжлээд байгаа. Сайд прокурор нар олон асуудлаар санал зөрөлдөөнтэй байгаа ч үүнийг тогоон дотроо салбарынханыгаа цуглуулж ярилцаж шийдвэрлэнэ гэж мэдэгдээд байсан. Тэгвэл нэгдсэн байр сууринд хүрч чадахгүй байгаа хууль зүйн салбарын шинэчлэлийн асуудал үндэсний аюулгүй байдлын зөвлөлийн түвшинд хүртлээ өндрөө авсан болохыг эх сурвалж онцолж байна. Тодруулбал өнгөрөгч амралтын өдрүүдэд ҮАБЗ өргөтгөсөн бүрэлдэхүүнээр их тэнгэрийн аманд хуралдсан байна. Хуралдаанд хууль зүйн сайд Х.Тэмүүжин, Улсын ерөнхий прокурор Х.Дорлигжав, Шүүхийн Ерөнхий зөвлөлийн дарга Н.Лүндэндорж, АТГ-ын дарга Н.Ганбаолд нар оролцсон бөгөөд нэлээд ширүүн уур амьсгалтай хурал болж өнгөрсөн аж. Ерөнхийлөгч Ц.Элбэгдорж Улсын Ерөнхий прокурорын байр суурийг дэмжсэн бол УИХ-ын дарга З.Энхболд баталсан хуулиа хамгаалж Ерөнхийлөгчтэй зөрчилдсөн гэх мэдээлэл ч зарим хэвлэлээр гарч эхлээд байна. Харин ҮАБЗ-ийн ажлын албанаас энэ талаар ямар нэгэн мэдээлэл хийгээгүй байна.