Сэлэнгэ аймгийн прокурорын газар, тус аймгийн Цагдаагийн газрын Мөрдөн байцаах тасагтай хамтарсан зөвлөгөөнийг зохион байгуулж сэжигтнийг баривчлах ажиллагааг Эрүүгийн байцаан шийтгэх  хуульд заасан журмын дагуу хэрхэн явуулж байгааг 2013, 2014 оны эхний улирлын байдлаар судлан үзэж нийтлэг гаргасан зөрчлийн талаар хэлэлцсэн байна.

Сэлэнгэ аймгийн Цагдаагийн газрын хэрэг бүртгэгч, мөрдөн байцаагч нарын дунд сэжигтнийг баривчлах ажиллагааг явуулахдаа тухайн сэжигтэн “Эрүүгийн байцаан шийтгэх ажиллагаанаас зайлсхийх зорилгоор зориуд санаатай байнгын оршин суугаа газраа орхих, овог нэрээ өөрчлөх, гадаад улсад болон өөр орон нутагт гарахаар /гадаад улсын виз, зорчигчийн тасалбар авч/ бэлэн болсон, анх саатуулагдах үед өөрийн биеийн байцаалтад холбогдох мэдээллийг зориуд буруу ташаа танилцуулан зугтах, нуугдахыг оролдсон идэвхитэй үйлдэл хийсэн” зэрэг нь тогтоогдсон эсэх талаар баривчлах тогтоолд   дурьдаагүй, мөн түүнчлэн ЭБШХ-ийн 59 дүгээр зүйлийн 59.3 дахь хэсэгт зааснаар  тогтоол, захирамжийг сэжигтэнд танилцуулах, түүнд … өмгөөлөгчийн хамт мэдүүлэг өгөх эрхтэй болохыг нь тайлбарлаж  өгөх…  ба энэ тухай тэмдэглэлд тусгана гэсэн заалтыг бүрэн хэрэгжүүлээгүй, зэрэг алдааг тогтмол гаргадаг болох нь шалгалтаар илэрчээ.

Шалгалтаар илэрсэн зөрчлийг арилгах зорилгоор прокурорын шаардлагыг тус аймгийн Цагдаагийн газарт хүргүүлсэн байна. Уг шаардлагад дээрх зөрчлийг давтан гаргахгүй байх удирдлага, зохион байгуулалтын арга хэмжээ авахыг Сэлэнгэ аймгийн Цагдаагийн газрын дарга цагдаагийн дэд хурандаа Л.Баярсайханд үүрэг болгосон байна.

Хамтарсан зөвлөгөөний хүрээнд  хэрэг бүртгэгч, мөрдөн байцаагч нарт зориулсан сургалтын хөтөлбөр боловсруулсаны дагуу  хяналтын прокурор А.Ариунзаяа “Прокурор байцаан шийтгэх ажиллагаанд оролцох нь”, Хяналтын прокурор Н.Гэрэлмаа “ АНУ-ын шүүхийн тогтолцоо” сэдвээр сургалт явуулсан байна.