Цэргийн радио долгионы тусламжтайгаар Малайзын алга болсон онгоцонд саатал үүссэний дараа чиглэлээ өөрчилсөн гэсэн саналыг дэвшүүлжээ. Малайзын албаны хүмүүс анхандаа Куала Лампур хотоос хөөрсөнөөс нэг цаг 10 минутын дараа ор сураггүй алга болж, Вьетнамын өмнөд хэсэгт орших Ка Маугийн хойг, Хятадын Өмнөд тэнгис дээгүүр нисч байхдаа осолдсон гэж үзсэн юм. Тэгвэл онгоц Куала Лампур хот руу буцаж ниссэн гэж таамаглаж байна. Өөрөөр хэлбэл, Малайзын баруун хэсэгт орших Малаккагийн хоолойд хүрсэн гэнэ. Ингэж буцаж нисч байхдаа холбоо тасарсан учраас дохио, мэдээлэл илгээгээгүй ажээ. 239 хүнтэй онгоцны талаарх мэдээлэл өнөөг хүртэл тодорхой бус байгаад зорчигчдын ар гэрийнхэн бухимдаж байна. Онгоцыг Малайз, Вьетнамын хоорондох далайн усанд унасан гэж таамаглаж байсан бол эрлийн талбайг 93 километрээр өргөтгөжээ.