ОХУ-ын гадаад хэргийн сайд Сергей Лавров Крымийн тусгаар тогтнол хууль ёсны алхам гэж хэлжээ. Крымийн парламент ОХУ-д нэгдэх асуудлаар бүх нийтийн санал хураалт явуулах тов гаргасан нь үндсэн хууль зөрчсөн алхам биш гэж Сергей Лавров үзэж байна. Хэрэв Крымийн иргэд ОХУ-д нэгдэхийг дэмжвэл Зөвлөлтийн задралаас хойш тусгаар тогтносон анхны улс болох юм. Энэ хооронд Украины оргон зугтсан ерөнхийлөгч Виктор Янукович "Украинд Барууныхны өдөөн хатгалгаар иргэний дайн үүсэх гэж байна" гэж шүүмжилжээ. ОХУ-ын өмнөд хэсэгт орших Ростов-на-Дону хотоос Янукович ингэж мэдэгджээ. Тэрээр “Украины шинэ удирдагчид барууныхны хөндлөнгийн оролцоог хүлээн зөвшөөрсөн. Шинэ Засгийн газар эрх мэдлийг хууль бусаар авч “дээрмийн дэглэм” тогтоож байна” гэж шүүмжилсэн байна. Мөн “Та бүхэн сохорчээ. Фашизмыг мартлаа гэж үү? гэж Барууныханд сануулмаар байна” гэж Янукович хэлжээ. Тэрээр өөрийгөө Украины хууль ёсны ерөнхийлөгч хэвээрээ гэж үзэж байгаа бөгөөд эргэж ирэх боломж гарна гэж найдаж буй ажээ. Тэрээр албан тушаалаасаа огцрохоос өмнө Крым дэхь хяналтаа алдаж байгааг анхааруулсан гэнэ.