Монгол Улсын гадаад өр ДНБ-ийнхээ тавин хувийг давж хүнд байдалд орсон тухай дээр дооргүй ярих болсон. Харин энэ асуудалд сангийн сайд Ч.Улаан “Худлаа мэдээлэл. Монгол Улс өрийн дарамтанд ороогүй. Улс орны өрийн дарамтыг тооцоолдог Олон Улсын Валютын сан /ОУВС/ дэлхийн банкны зургаан үзүүлэлттэй аргачлал байдаг. Тэр зургаан үзүүлэлтээс нэгээр ч Монгол Улс хэтрээгүй. Өр зээлээс айгаад байвал улс орныг хөгжүүлэх боломжгүй” гэсэн
утгатай зүйлийг хэвлэлд ярив. Мөн улсын өр ДНБ-ний 50 хувьд хүрсэн ч өрийн
дарамтанд оруулсан гэдгийг хүлээн зөвшөөрөхгүй гэдгээ хэлэв. Уг нь өрийн хэмжээ ДНБ-ий 50 хувьтай
тэнцвэл өрийн дарамтанд орж, аюулын дохио дуугарч эхэлж байна гэсэн үг
хэмээн хуулинд заасан байдаг аж. Сангийн сайдыг ийнхүү байр сууриа илэрхийлж байхад түүний нэр дурдаж онцолсон ОУВС тэс өөр зүйлийг хэлж байна. Тэд Монголын өрийг улаан зураас давж гарсан гэдгийг сануулж байна.
Олон улсын валютын сангийн хэд, хэдэн үзүүлэлт, шалгуураар Монгол улсын гадаад өрийн хэмжээ байж болох хязгаарыг даваад байгаа бөгөөд Дэлхийн банкны хамтран хийсэн өрийн зохистой байдлын анализаар “өрийн дарамтад орох эрсдэлтэй байна" гэсэн дүгнэлтийг хийжээ. Цаашлаад хатуу бодлого барьсан тохиолдолд ч өрийн дарамтад орохгүй байхын тулд нилээн хүч шаардсан ажлуудыг хийх хэрэгтэй гэдгийг анхааруулсан байна.
Тэдний үзэх буйгаар уул уурхайн салбарын өсөлт дунд хугацаанд буурч 2015 онд 5 хувь, 2018 он гэхэд бүр 1 хувь болтлоо буурах гэнэ. Мөн төгрөгийн ханш үргэлжлэн суларч инфляци хатуу бодлого барьснаас даруй 3-4 хувь өндөр байх болно гэжээ. Тиймээс шийдэмгий алхам хийж хатуу бодлого бодлого баримталж төсвийн тогтвортой байдлын тухай хуулиа баримталхыг сануулсан байна. Энэ мэтээр ОУВС Монголын эдийн засагт дундаас доогуур үнэлгээ өгч, өрийн дарамтын бага эрсдэл чинь өндөр эрсдэлрүү орлоо шүү гэдгийг сануулж байхад Манай сангийн сайд тус байгууллагын нэрийг дурдаж хэвлэлээр тэс өөр мэдэгдэл хийж яваа нь ямар учиртай вэ? Хэнд нь итгэх ёстой вэ? гэсэн асуулт урган гарч байгаа юм.
Олон улсын валютын сангийн зүгээс манай улсыг өрийн дарамтанд орох эрсдэлтэй гэж зарласан. Гэтэл Ч.Улаан сайд улс орноо өрийн дарамтанд орох эрсдэлгүй гэж мэдэгдэж байна.
Хэрвээ Ч.Улаан сайд ОУВС, Дэлхийн банкны нэр барьж худал ярьсан бол улс орны эдийн засгийн эмзэг асуудалтай холбогдуулан буруу, ташаа мэдээлэл өгсөндөө хариуцлага хүлээж огцрох нь зүйд нийцнэ. Харин ОУВС худал мэдээлэл хийсэн бол Монгол улсын эдийн засгийн байдлыг зориуд мушгин гуйвуулж олон улсад нэр хүндийг унагасан гэдэг үүднээсээ залруулга хийж, манай улсын Засгийн газар, ард түмнээс уучлал гуйх ёстой билээ.
Харин хэн нь худал хэлсэн эсэх тал дээр албан ёсны байр суурийг холбогдох газраас мэдэгдэх биз. Нөгөөтэйгүүр цаашид үргэлжлэх эдийн засгийн үзүүлэлтүүд ч мөн адил худал, үнэн хэлсэн эсэхийг төвөггүй батлах юм.
Т.Энхэлээ
Сэтгэгдэл (16)