Хятадын Засгийн газрын шинжлэх ухааны вэб сайтад хиймэл дагуулаар авсан гэрэл зураг нийтлэгдсэн нь ор сураггүй алга болсон Малайзын онгоцны хэлтэрхий байж болзошгүй юм. Хятадын Өмнөд тэнгист хөвж буй объектыг зурагт томруулан харуулжээ. Куала Лампур хотоос хөөрөөд нэг цаг 10 минутын дараа ор сураггүй алга болсон онгоцыг Вьетнамын өмнөд хэсэгт орших Ка Маугийн хойгт унасан хэмээн үзэж, эрэл хайгуулын ажил үргэлжилж байна. Хиймэл дагуулаар авсан энэхүү зургийг онгоц алга болсоны маргааш нь авчээ. Зургийн байршлыг газрын зургаас харж үзвэл Малайзаас зүүн тийш орших Хятадын Зүүн тэнгис, Вьетнамын өмнөд хэсэг мөн болох нь баттай ажээ. “Синьхуа” агентлагийн мэдээлсэнээр уг объект нь 24 x 22 метрийн хэмжээтэй бөгөөд онгоц байх магадлалтай юм. Мөн АНУ-ын тагнуулын хиймэл дагуулаар шинжиж үзэхэд дээрх бүс нутагт дэлбэрэлт болсон ямар ч шинж тэмдэг ажиглагдаагүй учир юу ч олж илрүүлээгүй ажээ. Харин Хятадын мэргэжилтнүүд алга болсон онгоцны эрэл хайгуулд зориулан өндөр технологийн хиймэл дагуулуудыг байрлуулжээ. Малайзын эрх баригчдын мэдээлж буйгаар онгоцтой холбоо тасрахаас өмнө хяналтын самбар дээр бүх зүйл хэвийн гэж зааж байсан гэнэ. Гэвч ердөө хэдхэн минутын дараа ор сураггүй алга болсон нь ихээхэн анхаарал татаж байгаа юм. Онгоцны 239 зорчигчийн 153 нь Хятадын иргэд байсан учраас тус улс эрэл хайгуулд ихээхэн анхаарч эхэлжээ. Хятадын гадаад хэргийн сайд онгоцны талаарх мэдээлэл зөрүүтэй, эрэл хайгуул удаан байгааг шүүмжилсэн юм.