Энэ сарын 10-ны өдөр Чингэлтэй дүүргийн нутаг Хайлаастын замд сургуулийн насны хүүхдийг мөргөөд хэргийн газрыг орхин явсан хэрэг гарчээ. Энэ талаар ЗЦГ-ын мэдээлэл, Шуурхай удирдлагын төвийн ерөнхий зохицуулагч, дэд хурандаа Р.Түвдэндоржоос тодруулахад "Энэ сарын 10-ны 20.00 цагт Чингэлтэй дүүргийн Хайлаастын замд "Портер" маркийн 1147 УБН гэсэн улсын дугаартай машин найман настай хүүхдийг мөргөж хэргийн газрыг орхиж явсан байгаа. Тэгэхээр иргэд хүн мөргөчихөөд зугтана гэдэг хүлээх хариуцлагаа нэмэгдүүлж байгаа хэрэг. Учир нь хэргийн газрыг санаатайгаа орхиж явсан гэх зүйл анги нэмэгддэг" гэв.

Харин зугтсан этгээдийг одоогоор саатуулан шалгаж байгаа юм. Тухайн этгээд энэ талаар хэлэхдээ "Хэрэг гардаг өдөр их хэмжээний мод ачиж явсан. Улмаар Хайлаастын Жаргалан гэх дэлгүүрийн урд найман настай охиныг шүргэн өнгөрсөн. Яах учраа мэдэхгүй сандарсан учир хөдөлгөөнөө цааш үргэлжлүүлээд явсан" гэж мэдүүлж байгаа аж.