АНУ-ын эрлийн багийнхан алга болсон Малайзын онгоцыг Энэтхэгийн далайд хайх хэрэгтэй гэж үзжээ. Цагаан ордны хэвлэлийн төлөөлөгч Жэй Кэрни “Энэтхэгийн далайд хайгуул хийвэл шинэ мэдээлэл олох боломжтой” гэж мэдэгдсэн байна. “Wall Street Journal”-д онгоц алга болсноос хойш дөрвөн цагийн дараа дохиоллыг нь хиймэл дагуулаар хүлээн авч болж байсан гэж мэдээлжээ. Тиймээс Боинг 777-200 онгоц хиймэл дагуул руу мэдээлэл дамжуулаагүй хэдий ч холбоо тогтоохын тулд дохио илгээж байсан гэж дүгнээд байгаа юм. Хэрэв энэхүү мэдээлэл үнэ бодитой бол онгоц далайд унахаасаа өмнө дөрвөн цаг ниссэн болох нь ээ. Боинг онгоцны хиймэл дагуулын систем нь зөвхөн нислэг үйлдэж байхад ажиллах боломжтой гэнэ. Малайзын агаарын тээврийн салбарынхны мэдээлсэнээр онгоц хиймэл дагуул руу автомат чимээ илгээсэн ажээ. Онгоц хамгийн сүүлд холбоо барьсан цагаасаа 1,600 гаруй километр ниссэн гэж үзэж байгаа юм. Дөрвөн цаг нисэхэд онгоцны түлш хангалттай хүрэлцэнэ. Америкийн мэргэжилтнүүд онгоцны харилцаа, холбооны систем дөрвөн цагийн дараа мэдээлэл дамжуулсан гэдэг нь сүйрээгүй болохын баталгаа гэж үзжээ. Холбоо тасрахаас өмнө онгоцны бүх зүйл хэвийн байсан нь онгоц сүйрээгүй байх найдвар төрүүлсээр байгаа юм.