Москвад Ерөнхийлөгч Владимир Путины эсрэг байр суурьтай, түүнийг шүүмжлэгчдийн ажиллуулдаг дөрвөн вэбсайтыг хаасан байна. Өрсөлдөгч Алексей Навальныйгийн блог болон хоёр мэдээллийн сайт. Мөн арай өөр чиглэлэээр ажиллуулдаг Гарри Каспаровын нэг сайт ОХУ-ын Ерөнхий прокурорын газрын тушаалаар хаагдсан аж.Мэдэгдэлдээ, эдгээр цахим хуудсууд сүүлийн үед гарсан хууль бус эсэргүүцлийн жагсаал, цуглааныг үе шаттайгаар зохион байгуулахад дэмжигч мэдээллийн хэрэгсэл болж байсан тул ийнхүү хаах шийдвэрийг гаргаж байна гэжээ.
Харин энэ үйлдлийг шүүмжлэгчид "үзэл бодлоо илэрхийлэх эрхийг хаан боогдуулж, эсэргүүцлийг зогсоохын тулд ОХУ-ын Засгийн газар эцсийн аргаа хэрэглэж байна даа" гэж дүгнэж байна.
Түүнчлэн цахим хуудсуудыг хаасныг эсэргүүцэж ОХУ-ын төв банкны вэб сайтыг хакердах оролдлого хүртэл хийгдсэн байна. Харин сайтыг ажиллуулагсдын зүгээс болон Кремлийн эрх баригчдын хэлснээр төв банкны сайтруу халдах техникийн боломж хакеруудад байгаагүй аж.
Сөрөг хүчний удирдагч Алексей Навальный одоогоор хоёр сарын турш гэрийн хорионд байгаа. Түүнийг хөрөнгө шамшигдуулахыг оролдсон хэрэгт буруутгасан бөгөөд одоо өгсөн шийтгэлийн нөхцлийг зөрчсөн тохиолдолд таван жилийн ял оноох юм. Түүнийг зочин хүлээн авах, эсвэл олон нийтийн сүлжээ ашиглаж болохгүй гэж гэрийн хорионд заажээ.
Алексей Навальныйгийн хэвлэлийн төлөөлөгч Анна Ведута вэб сайтыг хаасан явдлын талаар "энэ бол хэвлэл мэдээлэлдэх сөрөг хүчний дуу хоолойг арилгах улс төрийн шийдвэр" гэж твиттэр хуудаснаа бичсэн байна.
Хаагдсан цахим хуудсууд нь ОХУ-ын Ej.ru болон grani.ru мэдээллийн сайтууд мөн kasparov.ru вэб сайт юм байна. Ej.ru вэб хуудасны редактор Александр Риклин “энэ шийдвэр нь үг хэлэх эрх чөлөөний бүх зарчмуудыг шууд зөрчсөн" гэж мэдэгдсэн аж.
Тэгвэл ОХУ-ын төрийн харилцаа холбооны хяналтын агентлаг Roskomnadzor-аас "Эдгээр сайтууд нь хууль бус үйл ажиллагаа, тогтоосон дэг зөрчин хотод зохион байгуулагдсан олон нийтийн үйл ажиллагаанд оролцохыг өдөөн турхирахыг агуулсан" гэж мэдэгдэл хийжээ.
Сэтгэгдэл (3)