Вальютын зөрүүнээс болж алдагдал хүлээсэн зарим аж ахуй нэгжүүд төрөөр алдагдлаа нөхүүлэхээр зэхэж байгаа талаар бид мэдээлсэн. Улмаар энэ мэдээллийг сонссон иргэдийн  зарим нь дэмжиж, нөгөө хэсэг нь шүүмжилж байсан удаатай. Тэгвэл манай бүхий л компаниуд болж л өгвөл төрөөс хэдэн төгрөг гаргуулчих санаатай болчихоод байгааг дахин дуулгахаар болж байх шиг байна.

Учир нь алтны компаниуд хүртэл ашиг олж чадахгүй байгаагаа Гэнэтийн ашгийн татвар, урт нэртэй хууль гээд төрийн бодлогоос улбаатай хэмээн үзэж байна. Тиймээс ч төрөөс  хандив мөнгө, хөрөнгө оруулалт шаардахаар бэлтгэж байгаа сурагтай.

Тэгвэл энэ байдлаас болж нийгэмд дахин янз бүрийн хэл ам гарч байна. Гагцхүү ихэнх иргэд алтны том компаниуд даварч байна. Байгаль орчинг хамгийн их хохироож,  багагүй хэмжээний ашиг олдог байж төрөөс хөрөнгө оруулалт шаардаж байгаа нь буруу хэмээж байгаа юм.

Тодруулбал, Монголын алт үйлдвэрлэгчдийн холбооныхон энэ жил алтны шороон ордоос 11 тонн алт олборлох боломжтой гэж тооцоолжээ. Тэгвэл энэ хэмжээний алт олборлоход 300 орчим тэрбум төгрөг буюу 168 орчим сая доллар шаардлагатай гэнэ. Харин энэ дайны хөрөнгө оруулалтыг Засгийн газраас хүсэх гэж байгаа аж. Үнэхээр төрөөс тэдэнд хөрөнгө оруулалт хийвэл алтнаасаа эргүүлээд 440 сая ам.доллар олох  боломжтой гэдгээ ч тэд онцолж суугаа юм байна. Юутай ч Алт олборлогчдын холбооноос энэ шийдвэртэй санал нэгдэж Уул уурхайн яам, Эдийн засгийн хөгжлийн яаманд хандсан байна. Өөрөөр хэлбэл, тус холбооноос алт олборлогчдод тодорхой хэмжээний хөрөнгө мөнгөний дэмжлэг үзүүлэхийг хүсээд байгаа юм.

Ер нь ямарч салбарт төрөөс сайн, муу янз бүрээр нөлөөлж болно. Харин төр 100 хувь төгс байна гэж байхгүй. Тэгвэл төрийн бодлогыг буруушааж засгаас мөнгө нэхээд сууж байдаг тогтолцоогоо болих хэрэгтэй юм шиг. Өөрөөр хэлбэл, төр засгийн алдаатай зарим шийдвэрийг далимдуулж мөнгө нэхэж байгаа нь зөв үү? гэдгийг хаа хаанаа бодолцож үзмээр санагдах юм.

Ер нь Монголын бүх бизнес, бизнесмен, аж, ахуй нэгж, ард иргэд улсаас мөнгө нэхдэг жишиг рүү орж байна. Үүний тод илрэл бол яахын аргагүй алтны салбар юм.