Ардчилсан хувьсгалын партизануудын нэг гэгддэг, “сахал” хочит Б.Билэгт Шинэчлэлийн Засгийн газрын томилгоонд өртөж, ЦЕГ-ын даргаар томилогдсоноос хойш  багагүй хугацаа өнгөрөөд байна. Түүний хувьд анх энэ албанд томилогдохоосоо эхлээд л  шүүмжлэл, хэл амыг хүртэж байсан удаатай. 

Улмаар Б.Билэгт даргын хувьд салбартаа хийгдэж буй өөрчлөлт, шинэчлэлттэй гар, хөл нийлж ажиллахын оронд цагдаа дотор өөрийн нэр нөлөө, тойрон хүрээлэгчдийг бий болгох замаар ноёрхлоо тогтоох, өмнө байсан эрх мэдлээ хадгалж үлдэхийн төлөө л улайрах болсон гэх шүүмжлэлийг дагуулсан юм.

Харин сүүлийн үед салбарынх нь сайд түүнд “эгдүйцэж” буйгаа шуудхан хэлж орхидог болжээ. Энэ байдлаас болж Б.Билэгтийг удахгүй албан тушаалаасаа буух нь гэсэн шум нийгэмд бий болоод байгаа юм.

Зарим эх сурвалжийн хэлж буйгаар Б.Билэгтийн асуудлыг Засгийн газраар удахгүй авч хэлэлцэх аж. Энэ бүхнээс үзэхэд Б.Билэгт даргын суудал ёстой л ганхаж эхэлсэн бололтой.

Үүнийг бататгаж Хуульзүйн сайд Х.Тэмүүжин ширүүхэн шүүмжлэлүүдийг ч урсгаж эхэллээ. Тухайлбал, тэрбээр “Энэ хүн анх агентлагийн даргаар томилогдохдоо салбарын шинэтгэлийг дэмжинэ гэдгээ хэлж байж энэ ажлыг авсан. Одоо цагдаа хуучнаараа байвал өөрт нь илүү ашигтай гэж хараад байна уу, хэлж мэдэхгүй юм. Ямар ч байсан бидний үзэл бодол зөрөөд байна. Энэ бол эцсийн дүндээ хувь хүний биш, улс орны асуудал байхгүй юу. Түүнээс биш хувь хүний хувьд зөрчилдсөн юм байхгүй. Юутай ч хуулийн байгууллагад шаардлагатай байгаа шинэтгэлийг хийнэ. Магадгүй бодлогоо хамт боловсруулж, шинэтгэлээ хамтран хэрэгжүүлнэ гэх итгэл үнэмшилгүй хүнийг энэ газрын даргаар томилсон нь миний алдаа юм шиг байна. Цагдаагийн албаны тухай хууль 2014 оны нэгдүгээр сарын 1-нээс үйлчилж эхэлсэн. Үүнтэй холбоотойгоор ЦЕГ-ын удирдлагуудын томилгоог шинээр хийж, албажуулах ёстой. Гэвч би Б.Билэгт гэдэг хүн дээр энэ томилгоог хийгээгүй. Мэдээж хэрэг, асуудлыг Засгийн газраар оруулж шийднэ. Гэхдээ асуудлыг яаж оруулах, энэ хүнийг дахин томилох, эсэхээ би шийдээгүй байна” гэв.

Түүний хэлснээр бол Б.Билэгт дарга удахгүй суудлаасаа буух нь тодорхой боллоо. Гагцхүү оронд нь хэн гэгч томилогдох нь эргэлзээтэй байгаа юм.

Ер нь Хууль зүйн сайд Х.Тэмүүжин хуулийн шинэчлэлийг хийхийн тулд олон зөрчилтэй тулгарч байгаа. Гэвч тэр бүхнийг үл харгалзан хийе гэснээ хийж байгаа нь сайшаалтай юм. Юутай ч нийгэмд ч Х.Тэмүүжин сайдын ажилд саад болсон хүнтэй эвлэрэхгүй гэсэн байр суурь хүчтэй явагдаж байна. Учир нь шинэчлэлийг ингэж хийгүй бол болохгүй гэдгийг ард иргэд  ойлгосон бололтой.