Украинчууд Крымээс цэргүүдээ гаргах болсон талаар нийслэл Киев хотын аюулгүйн албаны дарга Андрей Парубий мэдэгдэв. Оросын талыг дэмжигчид цэргийн баазыг эзэлсэний дараа Крымийг Оросод нэгтгэсэн юм. Тиймээс ноён Андрей Оросын шахалтаар арга буюу цэргээ гаргахаар болжээ. Хэрэв Украинчууд Крымээс цэргээ татахгүй бол хүч хэрэглэх нь гарцаагүй гэж үзсэн байна. Тэрээр Крым Оросын нутаг дэвсгэр болсон нь тэнд амьдарч буй Украин иргэдийн аюулгүй байдалд заналхийлж байгаа тул барууны орнуудын дэмжлэг авна хэмээн мэдэгдэв. Мөн Украин тусгаар тогтносон улс хэдий ч Оросоос хараат хэвээр үлдсэн учир Америк, Их Британитай хамтран цэргийн сургуулилт хийх болно гэж ноён Андрей онцолжээ. Өнгөрсөн хоёрдугаар сарын 22-нд Украины Киев хотод ерөнхийлөгч Виктор Януковичийг огцруулахын төлөө тэмцэл ширүүсч, 80 гаруй хүн амиа алдсан юм. Мөн Крым Оросын бүрэлдэхүүнд орсоны дараа буюу уржигдар цэргийн баазад өрнөсөн мөргөлдөөний үеэр Украины нэг офицер амиа алдаж, хэд хэдэн цэрэг шархаджээ. Тиймээс Украинчууд нөхцөл байдлыг хурцдуулахгүйн тулд асуудалд тайван хандаж байгаа бололтой. Гэвч Крымд Украины далбаа газар хэвтэж, Оросынх мандаж байгаа энэ цагт зүв зүгээр суухгүй гэдгээ мэдэгдээд авсан юм.