Малайзын 239 зорчигчтой онгоцыг Энэтхэгийн далайн өмнөд хэсэгт эрэн хайх багийн бүрэлдэхүүнийг нэмэгдүүлсэнтэй зэрэгцэн нисэгчийн бүхээгт юу тохиолдсон талаарх шинэ таамаглал гарч ирлээ. Радио долгионы төхөөрөмжийн тусламжтайгаар онгоц Хятадын Өмнөд тэнгисээс Малаккагийн хойгийг чиглэн нисч байхдаа өндрөө огцом доошлуулж, 3600 метр болгосоныхоо дараа ор сураггүй алга болсон байна. Энэ нь онгоцыг санаатай төөрүүлсэнийг батлаж байгаа хэмээн эх сурвалжууд мэдээлэв. Өчигдөр Малайзын зам тээврийн сайд онгоцны хяналтын систем Бээжингийн чиглэлийг зааж байсан хэмээн ярьжээ. Гэвч холбоо тасрахаас өмнө хэн нэгэн хүн онгоцны чиглэлийг санаатайгаар өөрчилсөн гэнэ. Онгоцны нисэгчийн бүхээгт юу болсон талаар янз бүрийн таамаглал дэвшүүлж байгаа ч яагаад алга болсон, одоо хаана байгаа гэдэгт хариулт олж чадаагүй билээ. 
Онгоцны зорчигчид амьд олдоосой гэсэн итгэл найдвар, хүлээлт тасраагүй байна. Австралийн ерөнхий сайд Тони Эббот мөрдөгчид удахгүй юу тохиолдсоныг олж чадна гэдэгт итгэж буйгаа илэрхийлжээ. Шинжээчид, зөн билэгчид онгоцны талаар янз бүрийн таамаглал дэвшүүлээд байгаа юм. Нигерийн зөн билэгч Энэтхэгийн далайн ёроолд занганд орсон онгоцны хэлтэрхий удахгүй далай дээгүүр хөвж харагдана гэж хэлсэн билээ. Мөн Канадын шинжээч онгоц техникийн саатлаас болж шатсан гэсэн таамаглал дэвшүүлсэн. Юутай ч бүхий л таамаглал, мэдээллийг харгалзан үзэж, онгоцыг хурдан олох хэрэгтэй гэж Малайзын эрх баригчид үзэж байна.
