Украины Крымийн автономит мужийг ОХУ-д хүчээр нэгтгэсэн ерөнхийлөгч Владимер Путины дараагийн алхам юу байх вэ? гэдэгт дэлхий нийт анхаарлаа хандуулж байна. Тэгвэл ерөнхийлөгч Путин төрийн Думын хуралдааны үеэр нэгэн мэдээлэл хийсэн нь түүний дараагийн алхмын талаарх таамаглалыг гаргаж иржээ. Тэрээр “Зөвлөлтийн задрал Орос иргэдийг тусгаарласан учраас харамсалтай явдал болсон. Орос үндэстнүүд дэлхий дээр хил хязгаараар хуваагдахгүй оршин тогтнож чадвал хамгийн хүчирхэг гүрнүүдийн нэг болно” гэж хэлжээ. Путин хуучин Зөвлөлтийн бүрэлдэхүүнд багтаж байсан орнуудыг буцаан нэгтгэх оролдлого хийж магадгүй гэж ажиглагчид таамаглаж байна. Украины газар нутгийн 5 хувийг эзэлдэг Крымийг ОХУ-д хүчээр нэгтгэж чадсан В.Путины бодлогыг иргэдийн 71 хувь нь дэмждэг болохыг олон нийтийн судалгааны байгууллага тогтоожээ. Тиймээс ч Путины бодлогыг Оросууд дагах нь гарцаагүй. Хэрэв хуучин Зөвлөлтийн бүрэлдэхүүнд байсан орнуудыг өөртөө нэгтгэхийг завдвал Украины тусгаар тогтнол удаан оршин тогтнох нь эргэлзээтэй. Молдав улсын иргэдийн 10 хувь, Литвийн 6 хувь, Латвийн 27 хувь, Эстонийн иргэдийн 25 хувийг Оросын уугуул иргэд эзэлдэг байна. Хэрэв В.Путин дахин түрэмгий үйлдэл гаргавал эдгээр орнуудыг Украинтай адилхан хувь заяа хүлээж буйг үгүйсгэх аргагүй юм.