Хоёр сагсан бөмбөгийн холбоо нэгдэх асуудал гацаанд орсонд олон нийт С.Эрдэнэ сайдыг буруутгаж байна.

Өнгөрсөн ням гарагт болсон Монголын сагсан бөмбөгийн холбооны ээлжит бус чуулганаар МСБХ, МҮСБХ хоёр нэгдэх түүхэн шийдвэрийг гаргах ёстой байсан ч тэд нэгдсэнгүй. Уг нь дээрх ээлжит бус их хурлын гол зорилго нь хоёр сагсан бөмбөгийн холбоо нэгдэх цаашлаад нэгдсэн нэг холбооны  шинэ бүтэц чиглэлийг батлах байсан юм.

Эхний ээлжинд холбооны удирдах зөвлөлийн гишүүд тодорсон бөгөөд МУГТ Ц.Шаравжамц, ОУХМ М.Отгонбаяр, Спортын мастер Ж.Чинзориг, П.Ганбат, Б.Батпүрэв, СМ Батболд, О.Сайнбаяр, Э.Анар, М.Батцолмон, ОУХМ Ш.Сэдбазар, С.Болорсайхан, С.Эрдэнэ, Гантөмөр, Бат-Орших нарын спортын мастераас дээш цолтой 15 хүн сонгогджээ.

Харин нэгдсэн холбооны ерөнхийлөгчид МСБХ-ноос удирдах зөвлөлийн гишүүн Б.Тамир, харин нөгөө талаас ХАХНХ-ын сайд бөгөөд МҮСБХ-ны ерөнхийлөгч С.Эрдэнэ хоёр өрсөлдөж, хуралд оролцсон 200 орчим төлөөлөгчдийн 68 хувийн саналаар Б.Тамир холбоог тэргүүлэхээр болсон юм.

Гэтэл энэхүү шударга сонгуульд эгдүүцсэн С.Эрдэнэ сайд холбооны гишүүд дэмжигчидтэйгээ хаалга саван гарч одсоноор нэгдэх тухай яриа салхинд хийссэн байна. Тэрээр үүнийгээ удирдах зөвлөлийн гишүүд түүний санаанд нийцээгүйтэй  холбон тайлбарлаад тэднийг “Ажил хийдэггүй, юм ойлгодоггүй, сагсан бөмбөгийн спортыг зоосны нүхээр хардаг хүмүүс” хэмээн цоллоод авсан юм.

Уг нь нэгдэх тухай яриаг С.Эрдэнэ сайд өөрөө гаргаж их хурлыг ээлжит бусаар хуралдуулсан юм билээ. Гэтэл цагаа тулахаар чихрээ голсон хүүхэд шиг зан гаргасан нь сагсан бөмбөгтэй амь амьдралаа холбосон олон хүний дургүйцлийг хүргэсэн аж.

Түүнчлэн Засгийн газар дахь давхар дээлтүүдийн нэг тэрбээр дээлээ дахин нэгээр нэмэхийг хүссэн нь нийгмийн хамгааллын салбарт хийх ажилгүй болсон, завтай сайдын хийх ажил гэдгийг хурцаар шүүмжлэх хүмүүс ч байгаа юм.

Нөгөө талаас өөрсдийн зовлон жаргалыг сагсчид өөрсдөө сайн мэдэх нь ойлгомжтой. Гэтэл хэн нэг дарга сайд тэднийг удирдана гэж улайран дайрч, улс төржүүлэх нь хэр зохистой вэ? гэдгийг С.Эрдэнэ сайдаас асуумаар байна.