Алга болсон Малайзын онгоцыг Энэтхэгийн далайн өмнөд хэсэгт эрэн хайж байх хооронд хэлтэрхий байж болох бас нэгэн шинэ зургийг хиймэл дагуулаар авчээ. Тиймээс онгоц тасарч, хэдэн хэсэг болсон нь тодорхой болсон байна. Шинэ хэлтэрхий нь хайгуулын талбайгаас 2500 километрийн зайтай харагджээ. Мөн Францын хиймэл дагуул 23 метрийн урттай бас нэгэн объектын зургийг авсан талаар Малайзын зам тээврийн сайд Хишаммуддин Хуссейн мэдэгдсэн байна. Онгоцны хэлтэрхий байж болох 122 объект байгаа ч бүгд мөн эсэхийг нь илрүүлж чадаагүй гэнэ. Өнөөдрийн хайгуулын ажиллагаанд 6 цэргийн онгоц, 5 иргэний нисэхийн онгоц, 5 усан онгоц оролцоно гэж Австралийн тэнгисийн цэргийн хүчнээс мэдээлэв. Куала Лампур хотоос Бээжинг зорьж явсан онгоц Хятадын Өмнөд тэнгис дээгүүр нисч байхдаа гэнэт ор сураггүй алга болсон юм. Малайзын ерөнхий сайд Нажиб Разак онгоц Энэтхэгийн далайд осолдож, нэг ч хүн амьд үлдээгүй гэж мэдэгдсэн ч бүх зүйл оньсого мэт хэвээр байна. Мөрдөгчид онгоцыг барьцаалсан, нисэгчид нь хорлон сүйтгэх ажиллагаа явуулсан, цахилгааны гэмтэл гарсан гэсэн таамаглал дэвшүүлсэн ч аль алиныг нь батлаж чадаагүй билээ.