Украины инфляцын түвшинг 12-14 хувьд барина гэдгээ ерөнхий сайд Арсений Яценюк мэдэгджээ. Тэрээр Украины эдийн засаг дампуурлын ирмэгт тулж ирсэнийг нуусангүй. Украины Төв Банкны тооцоогоор гадаад өр 75 сая доллар буюу ДНБ-ий 53 хувийг эзлэх хэмжээнд тулж очсон байна. 2013 оны нэгдүгээр сарын 1-нд тус улсын алт, гадаад валютын нөөц 34,6 тэрбум доллар байсан бол одоо 15 тэрбум болж огцом буурчээ. Тиймээс эдийн засгийн хямралыг даван туулахын тулд төрийн албан хаагчдыг цомхотгохоор төлөвлөсөн байна. Нийт 249 мянган албан хаагчийн 24 мянгыг нь халахаар болжээ. Мөн баячуудаас авах татварыг нэмэхээр яригдаж байна. Эдийн засгийн хямрал Украины орлого багатай 300 мянган иргэний амьдралд нөлөөлж буйг ерөнхий сайд онцолжээ. Харин Олон улсын валютын сан Украинд 14-18 тэрбум долларын тусламж олгохоор тохиролцоонд хүрсэн байна.