Малайзын MH370 дугаар нислэгээр Бээжинг зорьсон онгоц өнгөрсөн гуравдугаар сарын 8-нд алга болсоны дараа нисэгчийн бүхээг дэхь харилцан ярианд шинжээчид анхаарлаа хандуулж байв. Өмнө нь нисэгчид хамгийн сүүлд “Бүх зүйл хэвийн, сайхан амраарай” гэж хэлсэн гэж таамаглаж байсан. Гэвч “Малайзын 370 онгоц минь сайхан нойрсоорой” хэмээн хэлсэнийг мөрдөгчид тогтоосон тухай зам тээврийн сайд мэдэгдэв. Нисэгчид ийм албархуу үг хэлсэн нь замаасаа хазайх төлөвлөгөөгүй байсныг гэрчилж байна хэмээн шинжээчид таамаглажээ.  Тиймээс онгоц яагаад чиглэлээ өөрчилж олон километр ниссэн нь оньсого хэвээр үлдлээ. Одоо алга болсон онгоцыг эрэн хайх ажиллагаа Энэтхэгийн далайд үргэлжилж байгаа юм. Хайгуулчид далайн усанд хөвж буй хэд хэдэн объект олсон ч Боинг 777 онгоцных мөн эсэхийг таниулж чадаагүй байна. Онгоцны хар хайрцгийг тусгай шумбагч төхөөрөмж ашиглан далайн гүнд хайж байгаа ажээ. Хар хайрцагны дохиоллын систем 30 хоног ажилладаг тул энэ хугацаанд олж чадахгүй бол эрлийн ажиллагаа улам хүндрэх нь тодорхой болжээ.