АНУ-ын иргэн Жон Мартин Кийнийг хөнөөсөн  гэх Ч.Баттуул өдгөө Цагдан хорих 461 дүгээр ангид хоригдож байгаа. Түүнд шүүхээс 23 жилийн ял оноосон юм.

Тэгвэл 23 настай бүсгүй чухам ямар учраас гадаад эрийг хөнөөв гэдэг асуулт одоо ч олныг гайхшруулсаар. Тэрбээр энэ хэргийг ганцаараа үйлдэж чадах уу гэдэг дээр  ч хүмүүс эргэлзсээр.  Цаашлаад энэ хэрэгтэй холбоотой  олон асуудлын  учиг тайлагдаагүй явсаар өдий хүрлээ.

 Тэр бүү хэл энэ хэрэг яахын аргагүй хар тамхитай холбоотой байгаа боловч манай хууль хяналтынхан дутуу дулимаг шалгасан ч юм шиг. Өөрөөр хэлбэл Ч.Баттуулын батлаад байгаа тэр хар тамхины учрыг нягталсан эсэх нь эргэлзээтэй байгаа юм. Хар тамхи авахаар очсон гэх орос, монгол залуус өдгөө сул, эрх чөлөөтэй явж байгааг ч Ч.Баттуулын аав хэлж байсан. Тэгэхээр АНУ-ын иргэн Жон Мартин Кийнээс эхлээд энэ хэргийн цаана байгаа хар тамхины хэргийг шалгах зайлшгүй чухал байгаа юм.

Мөн нэгэн шинэ мэдээллийг дэлгэхэд, Ч.Баттуулын хэргийн цаана  Төрийн өмчийн хорооны дарга асан Д.Сугарын хүү байж болох талтай гэдгийг эх сурвалж мэдээллээ. Тодруулбал, Ч.Баттуулаас хар тамхины дээж авах гээд очсон орос, монгол залуусын дунд одоо хар тамхины хэргээр шалгагдаж буй Д.Сугарын хүү С.Цог байсныг эх сурвалж нотолж байна.

ТӨХ-ний дарга асан Д.Сугарын хүү өдгөө хар тамхины хэрэгт холбогдчихоод шүүхийн байгууллагаар явж байгааг та бүхэн мэдэж байгаа биз ээ.

Юутай ч энэ хэрэг ийн улам л төвөгтэй болж байна.

Ч.Баттуулын сүүлийн үед өгч байгаа мэдүүлэгтээ "би энэ хэргийг хийгээгүй. Намайг хэргийг хүлээ гэж шаардсан. Шоронд ч намайг дарамталж байна" гэх мэтийн зүйл ярьж байгаа аж.  Мөн  “Цэвэр агаар сан”-гийн М.Хулангийн дүү М.Жаргалан, ТӨХ-ийн дарга асан Д.Сугарын хүү С.Цог нарыг ч тухайн хэрэгт холбогдуулан ярьж байгааг эх сурвалж хэллээ.

Өмнө нь Ч.Баттуулын Жон Мартин Кийнийг хөнөөсөн тухай айн сандран ярьсан мэдүүлэг нь бодит байдал дээрээ зөрөөд байгааг өмгөөлөгч нь онцолж байсан. Тухайлбал, Ч.Баттуул би Жон Мартин Кийнийг 60 метрийн зайнаас автоматаар шүршчихсэн гэж мэдүүлсэн байдаг. Гэвч хэргийн газраас олдсон буу шүршдэг буу биш, ангийн зориулалттай буу байсныг эд мөрийн баримтаар хураасан гэдэг.

Тэгэхээр л адаглаад энэ хэргийн цаана байгаа хар тамхины учир, хамтрагч, сүрдүүлэгч байна уу эсэхийг хуулийнхан дахин нягталж иргэдэд үнэн зөвийг мэдээлэх хэрэгтэй байгаа юм.