Сирийн удирдагч Башар Ассад босогчдын түшиц болсон газруудад терроризмын эсрэг ажиллагааг зохион байгуулсан хэвээр байх болно гэж мэдэгджээ. Тэрээр цус асгаруулсан тэмцэл явуулахаа больж, дэд бүтцийн бүтээн байгуулалтыг эвдлэхээ зогсоохыг хүсч байгаа тул босогчидтой аажимдаа эвлэрнэ гэдэгт итгэлтэй байгаа аж. Өчигдөр Ассад Сирийн төрийн эрхийг 1970 оноос хойш барьж буй Аль-Баад намын 67 жилийн ойн арга хэмжээнд оролцохдоо дээрх мэдэгдлийг хийсэн байна. Энэ хооронд Дамаск хотод Сирийн армийн цэргүүд босогчдын талын 11 хүнийг хөнөөж, 50 хүнийг шархдуулжээ. Ерөнхийлөгчийн хийсэн дээрх мэдэгдлээс үзвэл Сирийн Засгийн газар эвлэрэх санаачлагыг түрүүлж гаргах хүсэлгүй, харин гурван жил гаруй үргэлжилсэн иргэний дайн олон улсын дэмжлэг туслалцаатайгаар аажимдаа улс төрийн замаар шийдэгдэнэ гэж үзэж буй нь харагдана. Гэхдээ Засгийн газар Дамаск хотын захад тэмцэл өрнүүлж буй дөрвөн бүлэгтэй хэлэлцээр хийсэн юм. Цаашдаа бусад босогчидтой эвлэрч, хүч хэрэглэхээ зогсоох болно гэж ажиглагчид үзэж байна. Босогчдын тэмцэл Сирийн өнцөг булан бүрт өрнөж байгаа хэдий ч нийслэл Дамаск, Хомс хотуудад голчлон төвлөрчээ. Тиймээс 150 мянган хүний амь насыг авч одсон дайныг зогсооход тэндхийн босогчидтой эвлэрэх нь нэн чухал байгаа юм.