Оросын босогчдын талд эзлэгдээд байсан Харьков хотын төр захиргааны байр дахин Украины хяналтанд оржээ. Харьков хотыг чөлөөлөх ажиллагаанд оролцсон Украины хэд хэдэн тусгай албан хаагч шархадсан талаар ерөнхийлөгч Александр Турчинов мэдэгдсэн байна. Донецк хотыг Оросод нэгтгэх асуудлаар бүх нийтийн асуулгыг ирэх тавдугаар сарын 11-нд зохион явуулахаар товлосон нь Украины эрх баригчдыг тэмцэлд дуудсан бололтой. Даваа гаригт Оросын гадаад хэргийн сайд Сергей Лавров нөхцөл байдал иргэний дайны шинжтэй болж болзошгүй тул цэргийн хүчээ базаахгүй байхыг Украинд сануулжээ. Гэвч Украинчууд тун удахгүй Луханск, Донецк хотуудыг босогчдоос чөлөөлнө гэж мэдэгдсэн байна. Оросууд Украины Крымийг өөртөө нэгтгэж, зүүн хэсэгт орших хилийг нь цэргүүдээрээ бүсэлсэн энэ үед Донецк, Луханск, Харьков хотуудыг эзлэн авах нь гэсэн айдас барууныхны дунд байсан юм.