"Иргэдийн шударга шүүх" ТББ-ын тэргүүн Х.Бат-Ялалт Х.Тэмүүжин сайдыг таван удаа мэтгэлцье хэмээн урилга хүргүүлсэн. Гэвч Х.Тэмүүжин сайдыг түүний саналыг үл тоосоор байгаа. Тиймээс Х.Бат-Ялалт энэ байдалд дургүйцлээ илэрхийлж мэтгэлцэх саналаа буцааж авч байгаа аж. Харин огцрохыг шаардан тэмцэх нь зүйтэй гэж дүгнэжээ. Энэ талаар Х.Бат-Ялалт хэлэхдээ "Хуульч хүнд байх хамгийн чухал чанар бол ялангуяа ардчилсан нийгэмд бусдын үгийг хүлээцтэй сонсож, аливаа асуудлыг ухаалгаар шийдвэрлэх явдал. Нэгэнт Х.Тэмүүжин сайдад ийм чадвар байхгүй болох нь тодорхой болсон учраас ардчилсан төр засгийн удирдагч байх чадваргүй гэсэн үг.  Дарангуйлагчид л бусдыг үл ойшоож өөрийнхөөрөө бүхнийг зүтгүүлдэг. Тиймээс улс эх орны ирээдүй, шударга ёс, хүний эрх эрх чөлөөний аюулгүй байдлын төлөө Х.Тэмүүжин сайдыг огцрохыг шаардан тэмцэхээр шийдлээ" гэв.