АНУ-ын иргэн Жон Мартин Кийнийг хөнөөсөн хэрэгт буруутгагдан хоёр шатны шүүхээс 23 жилийн хорих ялаар шийтгүүлсэн Ч.Баттуулыг цагдан хорих 461 дүгээр ангид хорьж байгаад хэдхэн хоногийн өмнө 407 дугаар анги руу шилжүүлсэн юм.

  Ч.Баттуулын хувьд анхан шатны шүүхийн шийдвэрийг эсэргүүцэн давж заалдах шатны шүүхэд хандан гомдол гаргасан ч Давж заалдах шатанд онц хэрцгий аргаар гэдэг хэсгийг нь хэрэгсэхгүй болгосон ч ялыг  хэвээр үлдээсэн. Тиймээс өмгөөлөгч нь хоёр шатны шүүхийн шийдвэрийг эсэргүүцэн, Улсын дээд шүүхэд хандаад байгаа билээ.

Учир нь Ч.Баттуулын хэрэг маш эргэлзээтэй байгаа юм. Түүний хэлээд байгаа хар тамхины хэргийг хуулийнхан шалгасан уу, түүнд өөр хамсаатан бий юу, тэрбээр үнэхээр буудаж чадах уу гээд л олон ээдрээт асуудлууд байгаа юм.

Мөн Ч.Баттуул тухайн үед би Жоон Мартиныг хөнөөсөн гэж мэдүүлсэн ч одоо худал мэдүүлсэн гэдгээ хүлээн зөвшөөрөөд байгаа. Түүний өгч байгаа сүүлийн мэдүүлгүүдээс үзэхэд “Тэрбээр намайг энэ хэргийг хүлээ гэж шаардсан. Намайг ухаангүй болгосныхоо дараа хүмүүс энэ хэргийг хийчихээд над руу оруулсан. Би гэр бүлийнхнийгээ аюулд унагахгүйн тулд л түүнийг алсан хэмээн мэдүүлсэн” гэж байгаа юм.

Юутай ч хэрэг гардаг шөнө Жоон Мартин Кийнээс хар тамхи авахаар явсан гэх хүмүүс байгаа юм. Улмаар тэд мөнгөн дээрээ тохиролцож чадахгүй түүнийг хөнөөсөн гэх таамагч байсаар байна. Эх сурвалжийн мэдээлж буйгаар тухайн үед хар тамхины дээжийг авахаар очсон залуус дотор ТӨХ-ны дарга асан Д.Сугарын хүү С.Цогийг байсан гэх мэдээлэл бий. Гэвч Ч.Баттуулын хэрэгт холбогдуулж түүнээс мэдүүлэг авч, шалгасан эсэх нь тодорхойгүй байгаа юм.

Харин С.Цогийн хувьд өдгөө хар тамхи хэрэглэсэн, хүмүүст зарж борлуулсан хэмээн Эрүүгийн нэгдүгээр шүүхээр ороод байгаа. Өчигдрөөс эхэлсэн түүний шүүх хурал одоо ч дуусаагүй үргэлжилж байгаа юм. Харин шүүх хурал дээр очиж С.Цог нарын 12 хүнд холбогдох хэргийн мэдүүлгийг сонсож байхад С.Цог нь өмнө нь хар тамхи хэрэглэж  байсан байх магадлалтай байгаа юм.

Түүнтэй хамт Ц.Эрдэнэбилэг, Г.Бямбасүрэн, Б.Гүнбилэг, Д.Одхүү, Э.Золжаргал, Б.Энхтайван, Г.Ууганбаяр, О.Анударь, Т.Тамир, А.Анар, Н.Оюунжаргал нар шалгагдаж байгаа.  Тэднийг Эрүүгийн  хуулийн 188.2, 192.1, 192.2, 192.3.4-р зүйл ангиар шалгаж байгаа юм.

Шүүгдэгч Ц.Эрдэнэбилэгийн өгч байгаа мэдүүлэгт “Мансууруулах төрлийн бодисыг хэрэглэдэг. Нэг л хүнээс буюу Золбадралаас л мансууруулах бодисоо авдаг байсан. . Гурван удаа авч байсан. Тодруулбал, зургаан сард Золбадралаас гурван удаагийн үйлдлээр нийтдээ 900 мянган төгрөгөөр мансууруулах бодис авсан. Машинаа ломбарданд тавьж тухайн мөнгийг олсон” гэв.
 
Харин шүүгчдэгч Г.Бямбасүрэн “өмнө нь өгсөн мэдүүлгээсээ өөр мэдүүлэг өгөхгүй” хэмээв. Тиймээс Улсын яллагч мансууруулах төрлийн ямар, ямар төрлийн бодис хэрэглэж үзсэн бэ? гэх асуултыг тавихад "Зөвхөн өвс татаж үзсэн. Гэхдээ тухайн өдөр С.Цогоос мансууруулах бодис авсан нь үнэн ч хэрэглээгүй байсан" гэлээ.

Шүүгдэгч, Б.Гүнбилэг мэдүүлэгтээ “Би Золбадралтай С.Цогоор дамжуулж танилцаж байсан. Харин С.Цогийг нэлээн дээр үеэс мэддэг. Мөн мансууруулах төрлийн бодис авсан ч хэрэглээгүй байсан” гэв.

Юутай ч тухайн өдөр ТӨХ-ны дарга асан Д.Сугарын хүү С.Цогтой уулзсан хүн бүр хар тамхины хэрэгт холбогдон шалгагдаж байгааг албаныхан хэлж байв. С.Цогийн хувьд Хөрөнгийн биржид ажилладаг бөгөөд сүүлийн үед ажилдаа ирэхгүй байгаа аж.

Дашрамд хэлэхэд, эдгээр хүмүүс гадуур байцаалт өгч байгаа ба нэг л хүн хоригдож байгаа юм байна. Энэ талаар албаны хүнээс тодруулахад “Энэ хэрэгт холбогдон шалгагдаж байгаа хүмүүс мэдүүлгээ өгөөд явж байгаа. Харин Золбадрал л хоригдож байгаа” гэв.

 Харин С.Цогийн өмгөөлөгч Ө.Батжаргалаас С.Цог Ч.Баттуулын хэрэгт холбоотой юу. Хар тамхины асуудлаар өмнө нь мэдүүлэг өгч байсан уу? хэмээн асуухад “Мэдэхгүй” гэсэн хариултыг л өгч байв. Тэгэхээр тийм зүйл огт байхгүй гэж хэлэхгүй байгсныг бодоход С.Цог  Ч.Баттуулаас хар тамхины дээж авахаар очсон залуус дунд байсан байх магадлалтай байгаа юм.