Афганистаны гурав дахь том хот болох Хератын оршин суугч 23 настай Хитара бүсгүй олны нүднээс нуугдаж амьдрах болсон юм. Өнгөрсөн оны арванхоёрдугаар сард хар тамхинд донтсон нөхөр нь мөнгө өгөөгүйн төлөө түүнийг ийм аймшигтай нүүр царайтай болгожээ. Харгис нөхөр нь хамар, уруулыг нь хутгаар зүсэж, толгойг нь хүнд гэмтээснээр бүсгүй эмнэлэгт ухаангүй хүргэгдсэн байна. Тэрээр маш их цус алдсан учир эмч нар яаралтай хагалгаа хийжээ. Нөхөр нь бүсгүйг дөрвөн охиныхоо хамт унтаж байхад нь сэрээгээд ингэж тамлан зовоосон гэнэ. Хитараг эмнэлэгээс гарахад хүүхдүүд нь таниагүй хэмээн бүсгүй нулимс дуслуулан ярьж байна. Одоо түүний нүүр, уруулыг нь шилжүүлэн суулгахаас өөр аргагүй юм. Сүүлийн дөрвөн жилд Афганистанчууд эмэгтэйчүүдийн эрхийг хамгаалахад онцгой анхаарч байгаа хэдий ч гэр бүлийн хүчирхийллийг зогсоож чадаагүй байна. Хүний эрхийг хамгаалагчдын гаргасан судалгаагаар Афганистан эмэгтэйчүүдийн 19 хувь нь гэр бүлийн хүчирхийлэлд өртөн зовдог гэнэ. Мөн хар тамхинд донтсон хүмүүсийн тоо үүнээс ч өндөр байгаа нь нийгмийн өмнө тулгамдсан чухал асуудал болжээ.
