Нийслэлийн өмчид хамаарагддаг Төв бассейний барилга хуучирч бараг л нурах дээрээ тулаад байсан. Тодруулбал, өнгөрсөн 11 сард дээвэр нь нурж, тулгуур төмрүүд нь зэвэрсэнээс үүдэлтэй гэмтлүүд гарсанаар уг бассейн хаалгаа барихад хүрсэн. Тэгвэл энэ сарын 7-ноос төв бассейний засварыг хийж дууссан учир ажил үйлчилгээг нь хэвийн явуулж эхэлсэн сурагтай.

Гэвч засварыг хийсэн гэж байгаа ч дээвэр, гадна шугам гээд чухал ажлууд нь санхүүжилт байхгүй гэдэг шалтгаанаар хийгдээгүй байна.

Тиймээс тус бассейнээр үйлчлүүлдэг иргэд бага зэргийн айдастай байна гэхэд болох юм. 

Уг нь Нийслэлээс 35 сая төгрөг өгч завсар үйлчилгээг хийлгэсэн ч Төв бассейнийхан зөвхөн ванныхаа дотор талын плитаг будаж, өнгө оруулж, дүшнийхээ шугамыг сольсон байгаа юм. Мөн нурж унаад мэргэжлийн хяналтаас банга хүртсэн гэх дээврийнхээ багахан хэсгийг тогтоожээ. Өөрөөр хэлбэл, яг төв талынхаа дээврийг янзалсан байгаа юм.

Улмаар өдгөө үлдсэн завсаруудыг хийлгэхээр хоёр компанитай ярилцсан ч тэдгээр компаниуд нь 73, 76 сая төгрөг нэхээд халгаахгүй байгаа юм байна. Тиймээс дахин Нийслэлд хүсэлт гаргаж төсвийн тодотголоор энэ асуудлыг шийдэж өгөхийг  хүлээгээд сууж байгаа аж.

Ийн барилгын асуудалтай Төв бассейн дахин хэзээ нурж унах нь тодорхойгүй байгаа юм. Мөн байсхийгээд л дарга солигддог уг газар яг хэчнээн төгрөгний орлого олоод, түүгээрээ юу хийгээд байдаг нь тодорхойгүй байсаар 29 жилийг үдлээ.

Г.Арслан: Энэ байгууллага ашигтай ажиллаж болдог гэдгийг мэдээд АН өөрсдийн намыг хүнийг тавьж байна

Дашрамд хэлэхэд, тус бассейний өмнөх дарга Г.Арслан өөрийгөө хууль бусаар халагдсан хэмээн шүүхэд хандах дээрээ тулаад байгаа. Мөн тэрбээр “Миний урд байсан н.Ганбат захирлын үед улиралдаа 1.5 сая төгрөгийн ашигтай ажиллаж байсан. Харин би ажлаад аваад дөрвөн сарын дотор буюу улиралдаа 100 сая төгрөгийн ашигтай ажилласан. Би өөрөө ямар ч мөнгө идээгүй. Одоо Ардчилсан намын нөхдүүд тэнд очсон байх. Энэ байгууллага ашигтай ажиллаж болдог гэдгийг мэдээд өөрсдийн намын хүнийг тавьж мөнгө идэх  гэж байна. Бассейны их засварт  3-6 тэрбум төгрөг шаардлагатай гэдгийг би хэлсэн байгаа. Түүнийг ч гэсэн  идэх гэж байгаа байх. ” гэв.

Ч.Эрдэнэчулуун: Би Г.Арслан захирлаас 100-аад сая төгрөгийн өртэй байгууллага хүлээж авсан

Харин ажлаа шинээр хүлээж авсан захирал Ч.Эрдэнэчулуун “Г.Арслан захирал байх үед арав, арваннэг, арванхоёрдугаар сарын дулаан, ус суваг, цахилгаан , ажилчдын цалин болон нийгмийн даатгалаа төлөөгүй байсан. Дулаанаас ирээд цахилгаанаа хаангуут ачааллаа даахгүй шугам  хагарсан. Улаанбаатар шугам сүлжээнээс хүмүүс ирээд энэ  шугамыг солихгүй бол болохгүй, солиход ойролцоогоор 120 сая төгрөгийн төсөв орно гэсэн албан бичиг надад өгсөн. Харин дээврийн засвар хийлгэхээр хоёр компаниар үнэлгээ хийлгэхэд нэг 73 сая, нөгөө нь 76 сая төгрөг болно гэсэн. Би Г.Арслан захирлаас 100-аад сая төгрөгийн өртэй байгууллага хүлээж авсан” гэлээ.

 Юутай ч шинэ, хуучин дарга нар өөр өөрсдийгөө авч гарах гэж, хэн хэнрүүгээ буруугаа чихэж суух хооронд Төв бассейн дахин нурлаа гэж сонсогдох вий. Эцэст нь гэж хэлэхэд, дарга нарын бизнесийн газар болсон төв бассейний хувь заяа их л бүрхэг болоод байгааг Нийслэл болоод холбогдох байгууллагууд хяналтандаа авч цаашид хэрхэхийг нь даруй шийдэх хэрэгтэй биз ээ.