Үндсэн хуулийн цэцийн гишүүн Д.Сугарын бүрэн эрхийг түдгэлзүүлэх асуудал нэлээд хурцаар тавигдаж байна.

Гэвч  АТГ-аас Д.Сугар нь Япон улсын Токио хотын Адачи дүүргийн Шинден хороолол дахь 535.6 сая төгрөгний үнэтэй орон сууцыг 2008. 2009 оны мэдүүлэгт, уг орон сууцыг худалдсанаас олсон 535 сая төгрөгийн орлогыг 2010 оны мэдүүлэгт, Хонконгийн “Эйч Си Би Эс” банкин дахь өөрийн нэр дээрх оффшор данс болон иргэн Ч.Хоролсүрэнд хадгалуулсан гэх мөнгөний талаар 2007 оноос хойшхи мэдүүлгүүдэд, 2011 онд 600 сая вон буюу 666 сая орчим төгрөгөөр худалдаж авсан, Солонгос улсын Чежу, РАӨН хотхоны  101/ 701 тоот хувийн орон сууцыг 2012 оны мэдүүлэгт, энэхүү орон сууцыг 2013 онд худалдсанаас орох орлогыг 2013 оны мэдүүлгийн “авлага” хэсэгт тус тус мэдүүлээгүй байна.

Мөн “Транс трейд Би Би Эс Би” ББСБ-аас 2012 оны тавдугаар сарын 31-нд авсан 113 сая төгрөгийн зээлийн хүү 8.7 сая төгрөгийн хэмжээгээр дээрх ББСБ-аас санхүүгийн туслалцаа авсан нь Нийтийн албанд нийтийн болон  хувийн ашиг сонирхолыг зохицуулах, ашиг сонирхолын зөрчлөөс урьдчилан сэргийлэх тухай хуулийг зөрчсөн гэж үзэж байгаа.

Харин Д.Сугар "Намайг шалгана хэмээн дуудсан зүйл огт байхгүй. Гэхдээ би өөрийгөө ямар ч зөрчил гаргаагүй гэж хэлэхгүй ч тэдний хэлээд байгаа шиг олон янзын мөнгө байгаагүй.  Шинэ ажилд 2012 оны тавдугаар сарын 8-нд ороод хөрөнгө оруулгын мэдүүлгээ хуулийн хугацаанд зургаадугаар сарын 1-нд бөглөсөн. Үүний урд тавдугаар сарын 31-нд хүнээс авах ёстой байсан  113 сая төгрөгөө  авч өрөндөө өгсөн бөгөөд зургаадугаар сарын 1-нд аль хэдийнэ минийх биш болсон учир хөрөнгө орлогын мэдүүлэгтээ бичих шаардлагагүй гэж үзсэн.

Яг өнөөдөр гадаадад нэг ч долларын хадгаламж, барилга, хөрөнгө байтугай барилгад хэрэглэх тоосго ч алга. 2001 онд “ҮҮЦ” ХК-ийг хувьчилж авсан ажиллуулж орлого, дивиденд авдаг, түүнийгээ тухайн үеийн хөрөнгө орлогын мэдүүлэгтээ яг таг бичдэг байлаа. Мөн өөрийн эзэмшдэг хувиа 2007-2008 онд хамтрагчдаа 603 мянган доллараар зарсанаа ч хөрөнгө орлогын мэдүүлэгтээ дурдсан.

Мөн өөрт байсан жаахан мөнгөө бусдад таван хувийн хүүтэйгээр зээлүүлж, дараа нь банкинд хадгалуулж, түүгээр Японд байр авч,түүнийгээ мөн зарж, тэр  мөнгөөрөө Солонгост байр авч дараа нь зарсан. Эхнэрээ эмчлүүлэхийн тулд  японд байр авч байсан. Учир нь буудал, эмчилгээний мөнгө маш ихээр туссан. Улмаар 2013 оны намар байраа зарсан. Энэ тухайгаа ч хөрөнгө орлогын мэдүүлэгтээ бичсэн” гэв.

Тэрбээр АТГ-ын нотлоод байгаа баримт, мэдүүлээгүй гээд байгаа хөрөнгөнийхөө талаар ийн ярив. Тэгвэл энэ бүхний эргэцүүлсэн олон нийт хэн нь үнэн, хэн нь худал яриад байгааг ойлгохоо болилоо.

Юутай ч АТГ-ын тэргүүн комиссар Н.Ганболд энэ сарын 7-нд Үндсэн хуулийн цэцийн гишүүн Д.Сугарыг албан тушаалаас нь огцруулах хүсэлтийг УИХ-ын дарга З.Энхболдод явуулсан. Энэ дагуу өчигдөр  Хууль зүйн байнгын хороо хуралдаж Д.Сугарт хариуцлага тооцох асуудлыг хэлэлцэх гэсэн боловч МАН-ын бүлгийн зүгээс уг асуудлыг түр хойшлуулах саналыг гаргасан.  Мөн хуулийн дагуу Д.Сугарт хариуцлага тооцох эсэхийг Үндсэн хуулийн Цэц өөрөө шийдвэрлэх боломжтой гэж Хууль зүйн байнгын хороо үзсэн. Тиймээс Үндсэн хуулийн цэцээс Д.Сугарын асуудлыг нэг тийш болгох юм.