Сүүлийн үеийн улс төрийн халуун сэдвүүд болох "давхар дээл", бондын зарцуулалт, Х.Тэмүүжин сайдын тойрсон элдэв ярианы талаар Ерөнхийлөгчийн нийтлэг бодлого, олон нийтийн харилцааны зөвлөх А.Ганбаатар news.mn сайтад ярилцлага өгчээ. Хэдийгээр хилийн чанадад эмчлүүлээд эзгүй байгаа ч гэсэн ерөнхийлөгчийн байр суурийг энэ ярилцлагаас "уншиж" болно гэж ажиглагчид үзэж байгаа юм. Х.Тэмүүжингийн хариуцсан салбар дахь шинэчлэлийн алдаа онооны тухай биш, огт өөр сэдэв рүү анхаарал эргүүлж байгааг А.Ганбаатар онцлон тэмдэглэсэн байна.

Монгол Улсын Ерөнхийлөгчийн Олон нийтийн харилцааны бодлогын зөвлөх А.Ганбаатартай цаг үеийн сэдвээр ярилцлаа.

-Та саяхан Япон яваад ирэв үү?

-Тэгсэн. Би Монголын Хөлбөмбөгийн холбоонд сонгуульт ажилтай. Япон руу тэр шугамаараа яваад ирлээ. Японд зүүн Азийн Хөлбөмбөгийн холбооны чуулган болсон.

-Тэнд эмчлүүлж байгаа Монгол Улсын Ерөнхийлөгчтэй уулзав уу. Биеийн байдал нь ямар байгаа вэ?

-Ерөнхийлөгчийн эмчтэй уулзсан. Өөртэй нь утсаар цөөн хором ярьсан. Бие нь сайн болж байгаа гэсэн.

-Ерөнхийлөгчийн эзгүйд УИХ-ын хаврын чуулган эхэлж улс төрийн халуун үйл явдал өрнөж байна. Ерөнхийлөгчийн санаачилсан Засгийн газрын тухай хуульд нэмэлт, өөрчлөлт оруулах тухай хуулийн төслийг хэлэлцэж эхлэхтэй зэрэгцээд сайд нарын “давхар дээл”-ийг одоо тайлуулна гэж УИХ дахь МАН-ын бүлгийн гишүүд хэлж, жагсаал цуглаанд оролцлоо. Энэ талаар Ерөнхийлөгч байр сууриа илэрхийлсэн үү?

-Ерөнхийлөгчөөс ерөнхийдөө биеийн байдлыг нь л асуусан. Гэхдээ “давхар дээл”-ийн асуудлаар Ерөнхийлөгчийн байр суурь маш тодорхой шүү дээ. Энэ хуулийг 2016 оны долдугаар сарын 1-нээс хэрэгжүүлнэ. Тэр болтол сонгуулийн, намын, засгийн хуулиудаа боловсронгуй болгоё гэж байгаа.

-“Эдийн засаг хүндэрлээ. Бондоор л амьдарч байна” гэсэн яриа хөөрөө гарч байна. Ерөнхийлөгч хэдийгээр эмчилгээ хийлгэж байгаа ч гэсэн сэтгэл санаа нь наашаа байж үүнийг анхаарч байгаа болов уу?

-Ерөнхийлөгч өмнө нь Чингис бондын зарцуулалтын тайланг Засгийн газраас шаардаж байсан. Ард түмэн ч үүнийг шаардаж байгаа. Захын хүнээс асуу л даа.

-“Төрийн ордонд л ийм яриа яваад байна. Ард түмэн зүгээр л байна” гэж зарим сайд нар ярих юм? 

-Би олон нийтийн харилцааг хариуцдаг учраас сургаар юм хийдэггүй. Судалгаан дээр суурилахыг хичээдэг. Удаа дараагийн судалгаагаар иргэд бондын зарцуулалтыг болон бүтээн байгуулалтын явцыг тайлагнаач гэж шаардаж байсан. Эдийн засгийн хөгжлийн сайд Чингис бондын зарцуулалтыг хар толгойгоороо хариуцах  ёстой. 

-“Эдийн засгийн хөгжлийн яам байгуулсан биш харин эдийн засаг хөгжих биш бүр уналаа” гэж нэг шинжээч ярьж байсан?

-Эдийн засгийн асуудлыг Ерөнхий сайд хариуцах нь зөв гэж УИХ-ын гишүүд ч ярьж байна лээ.

-Сүүлийн өдрүүдийн бужигнаан дунд Хууль зүйн сайд Х.Тэмүүжингийн эсрэг сэдэвтэй асуудал хэвлэл, мэдээллийн хэрэгслүүдээр гараад эхэллээ шүү дээ. Энэ талаар юу хэлэх вэ?

-Энэ Засгийн газрын нүүрийг тахалж байгаа ганц салбар бол хууль, шүүхийн салбар, тэр салбарын шинэтгэл шүү дээ. Олон нийт ам сайтай, ид эрчээ аваад явж байгаа ажил бол тэр. Үүнийг аваад явж байгаа хүний талаар асуудал тавьж байгаад харамсч байна. Үүнийг тавьж байгаа улстөрчид яагаад Чингис бондын  зарцуулалтын тайлан, Монголоос хөрөнгө оруулалтыг хөөж гаргасан хүмүүсийн асуудлыг ярихгүй байж, болж бүтэж байгаа ажлыг хувь хүний асуудалтай хутгаж тавиад байгаа юм бэ. Энэ ойлгомжгүй, цэвэр улс төр харагдаж байна.

-Х.Тэмүүжин сайд алдаа гаргаад байгаа юм биш үү?

-Би Х.Тэмүүжинд найзын хувьд хэлж л байсан. Хуулийн шинэтгэлийг сайн хийж байгаа мөртлөө харилцааны хувьд алдаа гаргаж байгааг нь хэлж байсан. Хуулийн шинэтгэлийг ард түмэн дэмжиж байгаа. Иргэдийн талаас илүү хувь нь дэмжиж байгаа судалгаа гарсан байна лээ.

-Х.Тэмүүжин сайдын нэг эмэгтэйтэй холбоотой талаар УИХ-ын гишүүдэд “Маш нууц” гэсэн бичиг тараж байгаа юм байна. Тэр талаар сонссон уу?

-Би түүнийг мэдэхгүй. Тийм юм олж уншаагүй. Х.Тэмүүжингийн талаар тендэр будилуулсан, тэрбум тэрбумаар нь ард түмний хөрөнгө идсэн асуудал гарвал би тэр шүүмжлэлийг зөв гэж үзнэ. Харин хувь хүний асуудалд хуулийн шинэтгэлийг хутгаж унагаж болохгүй.

-Твиттертээ Х.Тэмүүжин сайд бичсэн байсан. “Над руу тавьсан сумны зэв нь О.Баасанхүү. Нум нь хаачив” гэж?

- О.Баасанхүүгийн хувьд угаасаа л хүний гар, хөл болж гарч ирсэн хүн. Нэг авлигачийг өмгөөлж байгуулсан намаас л сонгогдсон хүн шүү дээ. Үүний ард ямар зохион байгуулалт байгааг би мэдэхгүй. Хамтарч засаг барьж байгаа АН, эвсэл хоёр ийм юманд автаж, шинэчлэл хийж байгаа хүний асуудалд ингэж хандаж байгаа нь харамсалтай байна. Хэрэв эдийн засгийг шүүмжилж байгаа бол Чингис бондын зарцуулалтын тайлан, Монголоос хөрөнгө оруулалтыг хөөсөн популистууд, Эдийн засгийн хөгжлийн яам, Уул уурхайн яамтай л ярих ёстой. Ядуурал ярих гэж байгаа бол яагаад Хууль зүйн яамтай ярьдаг юм бэ.