Шинэ Зеландын “Golden Bay”-д төрж өссөн Зои Литч бүсгүй ирээдүйн нөхөр Чулаанбаатарын Энхнасантай 2008 онд Монголын говьд алтны уурхайд танилцаж байжээ.  Уурхайд хамтран ажиллаж байхдаа бие биедээ англи, монгол хэл зааж өгдөг байсан хосууд өөр өөрсдийнхөө хэлээр хольж ярин ойлголцдог байна. Түвшинбаяр хэмээх хүүтэй болсон тэд одоо амьжиргаагаа дээшлүүлэхээр Шинэ Зеландад амьдарч байгаа билээ. Энхнасан “Golden Bay A&P Show” хэмээх ноос ялгах талбайд ажилладаг. Нүүдэлчин гэр бүлд төрсөн болохоор ч тэр үү ажилдаа гаргуун. Насаа өмнө нь хэд хэдэн гадаад эмэгтэйтэй уулзаж байсан ч ярилцаж үзээгүй бөгөөд Зои бүсгүй бусдаас нэг л өөр санагджээ. Ингээд хосууд дотносож 2011 онд гэр бүл болцгоосон байна. Зои нутаг буцахаасаа өмнө Насаагийн малчин ээж аавынх нь гэрт очиж хэдэн сар хамтдаа амьдарсан бөгөөд Монгол заншлаар хуримаа хийсэн гэдэг. Зои бүсгүйн гэр бүлээс ихэр ах Пакс нь хуриманд ирж оролцсон ажээ. Насаагийн гэр бүл гадаад бүсгүйтэй гэр бүл болох гэж байгааг нь мэдээд анхандаа гайхсан ч гэрийнхэнд нь сайн хандсан учир хүлээн зөвшөөрсөн байна. Гэвч Зои Монголд удаан амьдарч чадахгүй тул хосууд Шинэ Зеландад иржээ. Англи хэлэндээ тийм сайн биш ч гэсэн Насаа бусад хонины ноос ялгагч ажилчдадаа үргэлж зааж зөвлөдөг. Түүнийг ажлаа чадварлаг хийж буйг хүн бүр хараад биширдэг гэнэ. Дэлхийд хониороо тэргүүлдэг Шинэ Зеланд улсыг Монгол залуу тал нутаг шигээ санан хонь хариулдаг юм. Заримдаа гэрээ санах боловч загасчилж цагийг өнгөрөөх дуртай. Зои, Наса хоёр өнгөрсөн жил Монголдоо буцан очиж, хэсэг хугацаанд амьдарч байгаад иргэн ирсэн байна.