ОХУ-ын ерөнхийлөгч Владимир Путин 3 цаг 55 минут телевизийн шууд ярилцлагад оролцохдоо Украин, Крым, Аляск, Обамагийн ирээдүйн зорилгын талаарх үзэл бодлоо илэрхийлсэн юм. Ярилцлагын төгсгөлд АНУ-ын тагнуулын нууцыг дэлгэснийхээ төлөө ОХУ-д найман сар гаруй орогнож буй Эдуард Сноуден асуулт асуусан нь онцгой зочин байлаа. Сноуден вэб камераар дамжуулан асуулт асуухдаа, Орос иргэдийн мэдээллийг нууцаар тагнаж буй үйлдлийн талаар байр сууриа хуваалцахыг Путинаас хүсчээ. Хариуд нь Путин Оросын иргэдийг тагнахын эсрэг байр сууртай буйгаа илэрхийлэв. “Нэн түрүүнд  тусгай албад, тусгай төхөөрөмж хэрэглэх түүний дотор яриаг чагнах, интернэтээр мөрдөн мөшгөх зэргийг зохицуулсан хатуу хууль журам манайд байдгийг хэлье. Тэр зохицуулалтаар тодорхой нэгэн хүний хувьд шалгах зөвшөөрлийг шүүхээс авах шаардлагатай. Тиймээс олныг хамруулсан тийм зүйл манайд байхгүй, хуулийн дагуу байх ч ёсгүй” хэмээн хариулсан байна.