Үндсэн хуулийн цэцийн гишүүн Д.Сугарыг гадаадад оффшор данстай, хөрөнгө оруулгаа худал мэдүүлж, хууль зөрчсөн хэмээн АТГ-аас олон нийтэд мэдээллээд сар гаруйхны хугацаа л өнгөрч байна. Тэгвэл үүнээс хойш Д.Сугарын талаар хаа сайгүй янз бүрийн л  яриа дэгдэж, энэ хүний хийсэн үйлдлийнх нь талаар шинэ содон баримтууд ч гарч ирсээр.  Харин Д.Сугар яаж энэ бүхнийг зүгээр хараад суухав.  Өөрийгөө өмгөөлсөн, хамгаалсан, илтэд хаацайлсан хэдэн үгээ чулуулдсаар.  Өөрөөр хэлбэл,  хэрэг хийсэн  хүн хэзээ ч өөрийгөө гэмт хэрэгтэн хэмээн төсөөлж чаддагүй шиг Д.Сугар ч өөрийгөө буруугүй хэмээн зарласаар байгаа юм. Гэвч эцэстээ энэ бүхэн хуулийн хүрээнд явагдах ёстой зүйл гэдгийг хаа хаанаа ойлгомоор юм. Тэгэхээр АТГ-ын зүгээс ч мөрдөн байцаалтын нууцад хамаарах зарим зүйлсийг олон нийтэд ил гаргахаа больж, Д.Сугар ч өөрийгөө хаацайлсан мессежийг нийгэмд тараахаа болих хэрэгтэй юм шиг.

Үнэхээр хууль зөрчсөн буруутай этгээд мөн л юм бол шалгуулдаг газар нь шударгаар очоод шалгуулах хэрэгтэй гэдгийг ч ард иргэд  хэлж байна. Мөн Д.Сугар шиг олон удаа томоохон хэргүүдэд нэр холбогдож явсан хүнийг Үндсэн хуулийн цэцийн гишүүн гэдгээр нь хэдий болтол хаацайлж суух гээд байгааг холбогдох эрхмүүдээс олон нийт ам асууж сууна. Эсвэл том жижиггүй Д.Сугарын нөлөөнд автчихсан хүмүүс үү гэдгийг ч хавчуулчихаарай гэж зарим иргэд захив.

Ер нь Д.Сугарыг өмөөрөх, “өр” тавьчихсан нөхөд өнөөгийн Үндсэн хуулийн цэц, УИХ, бүр хуулийнхан дунд ч байж магадгүй юм. Өөрөөр хэлбэл, түүнд ямар нэг хэлбэрээр өртэй хүмүүс л түүнийг өмгөөлөх сонирхолтой байна шүү дээ.

Ийн өөрийгөө өмгөөлж хаацайлж, хуулийнхныг буруутгадаг эрхмүүд манай улсад ямар ганц Д.Сугараар тогтохгүй юм.  Ганцхан жишээ дурдахад л,  Д.Сугарын энэ асуудлаас болж нэлээн хэл аманд өртөөд байгаа АТГ-ыг  саяхан Ерөнхий сайд хүртэл шүүмжлээд авсаныг та бүхэн санаж байгаа байх. Харин Ерөнхий сайдын хэлсэн “АТГ ажил хийлгэхгүй юм”  гэдэг үгэнд хариулт болгож  АТГ-ын тэргүүн комиссар Н.Ганболд “Тэр үг нь Н.Алтанхуяг гэдэг хувь хүний үг гэж бид ойлгож, Монгол Улсын Ерөнхий сайдын үг биш гэдэгт итгэж байна” хэмээв.

Мөн Д.Сугарыг “Өөрийгөө илтэд хаацайлсан ярилцлагууд өгч байна. Хууль зөрчсөн гэдэг нь тогтоогдсон” гэсэн юм. Ийн ажлаа хийж, үүргээ гүйцэтгэж байгаа АТГ-ын ажилд төвөгшөөж байгаа зарим эрхмүүдийн үгэнд АТГ-ын тэргүүн комиссор “анализ” хийсэн бололтой.

Юутай ч  Үндсэн хуулийн цэц шударга шийдвэр гаргаж, Д.Сугарыг шалгуулдаг газар нь шалгуулах хэрэгтэй юм. Учир нь энэ удаад Д.Сугарыг хэн өмгөөлж хаацайлах хийгээд Д.Сугар дахиад сугарч үлдэх үү? гэдэг олон нийтийн сонирхолыг ихэд татаад байна.