Өнгөрөгч баасан гарагийн орой Сүхбаатар дүүргийн нэгдүгээр хороо Замын Цагдаагийн газрын зүүн талд байрлах "S-OUTLETS" дэлгүүрийн хашаанд хураасан төмрийг нөгөө тал руу нь зөөж байгаад кран унасан хэрэг гарсан. Улмаар кран хашаагаа даван Нарны зам руу эргэдэг туслах замыг тэгнэн унасан билээ.
Тухайн үед газар дээр нь Нийслэлийн мэргэжлийн хяналтын газрын дарга М.Ням-Очир болон байцаагч нар хэргийн газарт очиж үзлэг хийсэн. Улмаар “S-Outlets”  буюу “Эс сайн” ХХК-ийн манаач, БЗД-ийн 21-р хороонд оршин суух 46 настай Ө.Батсайхан 2037 УНХ улсын дугаартай “Тадано” маркийн автомашин жолоодож, авто кранаа байрлуулахдаа газрын хөрсний нөхцлийг буруу тооцоолсон нь ийм хэрэг гарахад хүргэсэн гэдгийг мэдээлсэн юм. Ө.Батсайхан нь цамхагт краны машинчин мэргэжилтэй. Мэргэжлээрээ 2-3 жил ажилласан хүн байжээ. Мөн кранчинаас  гадна тус компанид манаачийн ажил хийдэг байсныг ЦЕГ-аас мэдээлсэн юм.
Ё.Лхагвасүрэн: Краныг унагасан манаачид эрүүгийн хэрэг үүсгэсэн
 
Юутай ч хэргийн талаар ЦЕГ-ын хэвлэл мэдээллийн төвийн ахлах байцаагч, цагдаагийн ахмад Ё.Лхагвасүрэнгээс тодруулахад "Одоо Сүхбаатар дүүргийн цагдаагийн хэлтэст уг асуудлаар эрүүгийн хэрэг үүсгэн шалгаж байгаа. Тухайн үед краныг тус компанийн манаач ажлуулсан байдаг. Тиймээс түүнд эрүүгийн хуулийн 183,1 дүгээр зүйл ангиар эрүүгийн хэрэг үүсгэсэн. Энэ зүйл ангид “Уул, уурхай, барилга, түүнчлэн тэсэрч дэлбэрэх аюул гарч болзошгүй үйлдвэр бусад аж ахуйн нэгж, байгууллагад аюулгүй ажиллагааны журам зөрчсөний улмаас хүний амь нас хохирсон, бусад хүнд хор уршиг учирсан бол тодорхой албан тушаал эрхлэх, үйл ажиллагаа явуулах эрхийг гурван жил хүртэл хугацаагаар хасах буюу хасахгүйгээр хөдөлмөрийн хөлсний доод хэмжээг тавин нэгээс хоёр зуун тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл таван жил хүртэл хугацаагаар хорих ял шийтгэнэ гэж заасан байдаг" гэв.
Р.Бурмаа: Шөнийн 03.15 цагт өргөгч цамхагийн сумны хэсгийг тасдаж, замыг чөлөөлсөн

Харин НОБГ-ын албаны эх сурвалжаас уг хэргийн талаар тодруулахад "Сүхбаатар дүүргийн 1 дүгээр хороо Замын цагдаагийн зүүн талд өргөгч цамхаг унасан байна гэсэн мэдээллийг 18:02 цагт өгсний дагуу дүүргийн Онцгой байдлын хэлтсийн ГХТББХАМ, ахлах байцаагч, цагдаагийн хэлтсээс 4 албан хаагч, Мэргэжлийн хяналтын хэлтсийн 2 байцаагч, Нийслэлийн ерөнхий төлөвлөлтийн газрын 1 мэргэжилтэн нар очиж шалгахад 40 тонны өргөгч цамхаг автозамын зорчих хэсэг дээр унасан байсныг чөлөөлөлх арга хэмжээ авч ажилласан. Улмаар шөнийн 01:15 цагт Аврах ангийн аврах салбарын ээлжийн бүлэг очиж өргөгч цамхагийн сумны хэсгийг тасдагч багажаар тасдаснаар 03:15 цагт бүрэн чөлөөлсөн" гэв.
Юутай ч энэ осолд хүн бэртэж гэмтээгүй ч маш ноцтой осол болсон гэдэг албаныхан хэлж байна. Улмаар хэрэг цааш хүндэрвэл манаачдаа үүрэг даалгавар өгсөн тус компаниудын удирдлагуудад ч хариуцлага хүлээлгэж магадгүй байгаа юм.