Өнгөрсөн сарын 28-29-ний өдрүүдэд иргэн Б нь өөрийн эзэмшлийн интернэт банкны данснаас 8,200,000 төгрөгийг үл мэдэгдэх дансанд шилжиж, бусдад мэхлэгдсэн гэмт хэргийн хохирогч болжээ. Хэргийн мөрөөр Эрүүгийн Цагдаагийн Газрын Цахим гэмт хэрэгтэй тэмцэх тасгаас холбогдох ажилтнууд ажиллаж гэмт этгээдийг олж тогтоон эрүүгийн хариуцлагад татсан байна.

 Энэ талаар ЦЕГ-ын хэвлэл мэдээллийн төвийн ахлах байцаагч, цагдаагийн ахмад Ё.Лхагвасүрэнгээс тодруулахад "Гэмт этгээд Д нь хуурамч бичиг баримт ашиглан банкинд данс үүсгүүлж хохирогч Б гийн талаарх мэдээллийг интернэтээс цуглуулж түүний цахим шуудангийн нууц үг, гар утасны дугаар, регистрийн дугаар зэрэг хувийн мэдээллийг залилан мэхлэх аргаар хохирогчоос авч түүний интернэт банкны данс руу нэвтэрч урьдчилан бэлдсэн дансандаа шилжүүлэн авч ашигласан. Тодруулбал, тэрбээр Монгол Улсад үйл ажиллагаа явуулж байгаа арилжааны банкуудын нэр болон үүрэн телефоны операторуудын нэрийг барьж таны регистрийн дугаар, овог нэрийг дутуу тэмдэглэж авсан байна, дахиж хэлж өгнө үү хэмээн хууран мэхэлж, хувийн мэдээллийг нь авч ашигласнаар энэхүү гэмт хэргээ үйлдсэн байсан.  Одоо түүнийг Баянзүрх дүүргийн Цагдаагийн 1-р хэлтэст эрүүгийн хэрэг үүсгэн шалгаж байгаа. Мөн  уг этгээд энэ хэргээс гадна  20 гаруй үйлдэлтэй нь илрээд байна.  Иймд иргэд үл таних хүнтэй холбоо тогтоохдоо анхааралтай байж ялангуяа өөрийн мэдээллийг бусдад өгөхдөө онцгой анхаарч, болзошгүй эрсдэлээс өөрийгөө болон бусдыг хамгаалах хэрэгтэй" гэв.