ОХУ-ын ерөнхийлөгч Владимир Путин Украины зүүн хэсэгт зохион явуулж буй терроризмын эсрэг ажиллагаа өөрийн иргэдийнхээ эсрэг зэвсэг хэрэглэхийг зөвшөөрсөн үйлдэл гэдгийг сануулав. “Хэрэв Киевийн эрх баригчид цэргүүдэд зэвсэг хэрэглэхийг зөвшөөрвөл ард иргэдийн эсрэг аюултай гэмт хэрэг болно” хэмээн Путин Петерсбург хотноо зохион байгуулсан хэвлэлийн бага хурлын үеэр ярьжээ. Тэрээр зүүн хэсэгт өрнөж буй Орос иргэдийн бослогыг намжаахын тулд үндэсний хэмжээний хэлэлцүүлэг өрнүүлэхийн оронд хүч хэрэглэж, хэт даврагч бүлэглэлүүдийг өөгшүүлж байна гэжээ. Женевийн хэлэлцээрийн аль аль тал нь зэвсэг хэрэглэхгүй гэсэн ч энэ амлалтаа зөрчиж байна хэмээн Оросын эрх баригчид Украиныг буруутгаж байна. Харин Украин болон Барууныхан Оросыг нууцаар цэргийн ажиллагаа явуулдаг хэмээн буруутгасаар байгаа билээ. Мөн В.Путин “Манай холбооны улсын төсвийн тэнцэл 240 тэрбум буюу 6,7 тэрбум долларын илүүдэл ашигтай гарсан. Тэгэхэд Крымд хамгийн ихдээ 100 тэрбум рубль буюу 2,8 тэрбум долларын тусламж олгох шаардлагатай байна” гэжээ.