Өнөөдөр УИХ-ын нэгдсэн чуулганы хуралдаантай үдээс өмнөх хуралдаанаар “Эдийн засгийг эрчимжүүлэх зарим арга хэмжээний тухай” Улсын Их Хурлын тогтоолын төсөл, Засгийн газрын гишүүнийг огцруулах тухай” Улсын Их Хурлын тогтоолын төсөл, Улсын  Их Хурлын гишүүн С.Дэмбэрэл, А.Бакей, Р.Гончигдорж, Д.Лүндээжанцан, Сү.Батболд, Н.Батцэрэг нарын өргөн мэдүүлсэн Засгийн газрын тухай хуульд нэмэлт оруулах тухай хуулийн төсөл, “Эмийн талаар төрөөс баримтлах бодлого батлах тухай” зэрэг асуудлыг хэлэлцэнэ. Харин үдээс хойшхи хуралдаанаар УИХ-ын гишүүн Д.Оюунхорол, Ж.Эрдэнэбат нараас сангийн сайдад хүргүүлсэн "2013 оны төсвийн гүйцэтгэл, самурай бондын зарцуулалт"-ын талаархи асуулгын хариуг сонсох юм байна. Үүнээс иргэдийн хамгийн их анхаарал татаж буй асуудал нь хууль зүйн сайд Х.Тэмүүжинг огцруулах тухай юм. Өчигдөр хуралдсан хууль зүйн байнгын хорооны хуралдаанаас түүнийг үүрэгт ажлаас нь огцруулах нь зүйтэй гэсэн дүгнэлтийг гаргаж чуулганы нэгдсэн хуралдаанд танилцуулахаар болсон билээ.