Газрын тос, байгалийн баялаг нь Катарыг дэлхийн хамгийн баян улс болгож, 2022 оны дэлхийн хөлбөмбөгийн аварга шалгаруулах тэмцээнд зориулж 200 тэрбум доллараар шинэ цэнгэлдэх барихад хүргэжээ. Катарын нийслэл Доха хотод зарим өдөр хэт халж, хүмүүс ажилдаа явж чадахгүй болдог байна. Тиймээс шилэн цамхгуудын дэргэд хиймэл ой байгуулах болжээ. Катарчуудын амьдрал сайжирч, хэрэглээ нь өндөрсөхийн хэрээр гэр бүл салалт ихсэх болсон байна.
    Ард иргэдийнх нь дундаж орлого 100 мянган доллар болж, дэлхийн хамгийн баян улс болсон ч нийгмийн сэтгэл зүй тийм ч сайнгүй байгаа гэнэ. Энэ нь Катарын нийгэм, соёлын огцом өөрчлөлттэй холбоотой гэж судлаачид үздэг. Доха хотын барилгуудыг нурааж, дахин төлөвлөснөөс болж дуу чимээ ихсэх, авто замын түгжрэл зэргээс хүмүүс стресстэх болжээ. Мөн гэр бүл салалт 40 хувьд хүрч, иргэдийн гуравны нэг нь хэт таргалалтад өртсөн байна. Катар айлын гэр бүлийн амьдрал салан тусгаарлагдмал юм. Хүүхдүүд нь Непаль, Индонези, Филиппинээс ирсэн асрагчдынхаа гар дээр хүмүүжиж байна.