CТА цол тэмдэгээр энгэрээ мялаасан “Шинэ үе” продакшны жүжигчин Ц.Алдармаа хамтлагийнхаа жүжигчин Д.Оюунтуултай маргалдсаны улмаас нэгнээ халуун усаар түлж хүнд гэмтээсэн талаарх мэдээлэл өнөөдөр шуугиан тарьж байна. Жүжигчин бүсгүйчүүд чухам юунаас болж муудалцаж, ийн нэгнээ гэмтээх болсон нь одоогоор тодорхойгүй байгаа ч цагдаагийн байгууллагад өргөдөл гомдол өгөх нь тодорхой болоод байгаа аж.

Жүжигчин бүсгүйчүүдийн хувьд Орхон аймагт энэ сарын 27-нд аялан тоглолтоор явж байхдаа ийн муудалцсан юм байна.

Тиймээс эл хэргийн  талаар Орхон аймгийн цагдаагийн хэлтсийн дарга Н.Даваазулаас тодруулахад, “Иим хэрэг гарсан нь үнэн. Дуудлага мэдээллийн дагуу манай цагдаагийн хэлтсээс тухайн газар очсон. Гэвч бүсгүйчүүд хоорондоо учраа олсон. Улаанаатарт очоод гомдол гаргах эсэхээ шийднэ гэж хэлсэн. Тиймээс манай цагдаагийн хэлтэст уг хэрэг шалгагдаагүй” гэлээ.

Тэгвэл тухайн хэргийн талаар ЦЕГ-т гомдол мэдээлэл ирсэн эсэхийг тодруулахад “Одоогоор тийм өргөдөл, гомдол ирээгүй байна” гэв.
Ингээд бид Д.Оюунтуулын хэвтэж буй Түлэнхийн төвийг зорьсон юм. Саппород байрлах “Мөнгөн гүүр” эмнэлэг дотор  Түлэнхийн төв байрлаж байгаа юм байна. Улмаар тус эмнэлгийн жижүүрээс Д.Оюунтуул жүжигчинг аль тасагт хэвтэж байгааг тодруулахад “Эрчимт эмчилгээний тасагт” гэв. Ингээд  гурван давхарт байрлах Эрчимт эмчилгээний тасагт очиход тэрбээр ар гэрийн асрамжинд өрөөндөө байж байв. Цээжин бие нь багагүй түлэгдсэн бололтой битүү лентээр ороосон, харин нүүр царай нь шарх сорви тогтоогүй харагдав.
Юутай ч зорьж очисных биеийн байдлыг нь асуухаар эгчтэй нь уулзаж ярилцахад “Дүүгийн маань биеийн байдал гайгүй байгаа. Хэвлэлээр гараад байгаа шиг 65 хувийн түлэгдэлт байхгүй. Одоогоор хэвлэл мэдээллийн хэрэгслээр дэлгэрэнгүй яриа өгөх боломжгүй байна. Нүүрэндээ түлэгдсэн зүйл байхгүй” гэв.

Ц.Алдармаа: Тэр надруу савтай ус, би түүн рүү аягатай ус цацсан
Тэгвэл энэ асуудлын талаар жүжигчин Ц.Алдармаа тайлбар хийхдээ "Туул өөрөө эхэлсэн. Тэр над руу эхэлж ус буцалгагчтай халуун ус цацахаар нь хариуд нь аягатай ус цацсан. Би ч бас хохирогч" хэмээсэн юм. Гэхдээ одоогийн байдлаар Ц.Алдармаа эмнэлэгт хэвтэн эмчлүүлж байгаа үгүй нь тодорхойгүй байна.

Бооёо: Хэн, хэн нь гомдолгүй учраас шалгуулахгүй

Харин тус продакшны захирал Бооёо  “Бид шалгуулах шаардлагагүй. Хэн хэн нь гомдолгүй гэсэн учраас шалгуулахгүй” гэсэн тайлбар өгөөд байна.

Дашрамд хэлэхэд, “Шинэ үе” продакшныхан сүүлийн үед нэлээн түнжин муутай байгаа юм. Тодруулбал,  саяхан Боёо, Г.Ундармаа хоёр муудалцаж, одоо болтол эвлэрээгүй байгаа. Гэтэл залуу жүжигчид ийн гар зөрүүлж, нэгэнлээ өширхөсөн нь тус продакшны дунд багагүй хагарал байгааг харуулж байна.