Украины баруун өмнөд хэсэгт орших Одесса хотод Оросын салан тусгаарлагчид тэмцэл өрнүүлсэний улмаас мөргөлдөөн гарчээ. Украины Засгийн газрыг дэмжигчид болон Оросын босогчид хоорондоо мөргөлдөж, төр захиргааны ордноо галдан шатаасан байна. Үймээний улмаас амиа алдсан хүмүүсийн тоо 31-д хүрээд байгаа талаар Украины дотоод яамнаас мэдээлэв. Амиа алдсан хүмүүсийн дийлэнх нь барилгаас үсэрсэн бол үлдсэн хэсэг нь утаанд хордсон гэнэ. Одесса хотод эмх замбараагүй байдал түргэн хугацаанд газар авч, хяналтаас гарч эхэлсэн хэмээн эрх баригчид үзэж байна. Үүнээс өмнө Словянск хотод олон босогч Засгийн газрын хэрэгжүүлж буй терроризмын эсрэг ажиллагаанд өртөж амь үрэгдсэн хэмээн Украины ерөнхийлөгчийн үүргийг түр орлон гүйцэтгэгч Александр Турчинов мэдэгджээ. Женев хотноо болж өндөрлөсөн дөрвөн талт хэлэлцээрээр талууд хямралыг даамжруулахгүй байхаар зөвшилцсөн ч энэ амлалт нь биеллээ олж чадсангүй. Энэ хооронд Барууныхан Оросыг буруушааж, Оросууд өөрсдийгөө зөвтгөсөн хэвээр байна. АНУ-ын ерөнхийлөгч Барак Обама, Германы канцлер Ангела Меркель нар Оросын эсрэг нэмэлт хориг арга хэмжээ авахаар ярилцаж байгаа юм.
Сэтгэгдэл (10)