Монголдоо ганцхан байдаг хараагүй хүүхдүүдийн 116 дугаар сургуулийн удирдлага, багш ажилчид хөгжлийн бэрхшээлтэй хүүхдүүдийг хөдөлмөрийн мөлжлөгт оруулж, хувьдаа мөнгө олдог талаарх мэдээллийг бид хүргэсэн.

Өөрөөр хэлбэл, тус сургуулийн удирдлагууд хараагүй хүүхдүүдийн авьяас, хөдөлмөрөөр “бизнес”  хийдэг байсан нь илэрсэн юм. Тэгвэл эл мэдээлэл олонд ил болсоноос хойш иргэд БСШУ болоод сайд нь уг сургуульд арга хэмжээ авах ёстой, мөн холбогдох байгууллагуудаас тухайн сургуульд хяналт, шалгалтыг оруулах хэрэгтэй хэмээн шаардах боллоо.
Юутай ч ийн хэл аманд өртөөд байгаа 116 дугаар сургуулийн багш, удирдлагууд хүүхдийг хөдөлмөрийн мөлжлөг оруулахаас гадна багагүй зөрчлүүдийг ч  гаргаж байжээ. Энэ талаар тухайн сургуульд нярав хийж байгаад, удирдлагынхаа бусармаг үйл ажиллагааг хэлсэнээр халагдсан ажилтан мэдээлэл хийсэн юм.

 Тиймээс хөгжлийн бэрхшээлтэй хүүхдүүдийн 116 дугаар сургуульд яг ямар зөрчлүүд бий болоод байгааг доор сийрүүлье.

1.Хараагүй хүүхдүүдийн ур чадвар, авьяасыг ашиглан “хандив босгох” нэрээр хөрөнгө босгож, олсон ашиг орлогыг хувьдаа завшдаг.

2.Хөгжмийн багш мэргэжилтэй хүнээр англи хэл, мэдээлэл зүй гэх хичээл заалгана хэмээн сул цалин олгодог.

3.Төрийн удирдах албан тушаалтны баримтлах ёстой ёс зүй, төрийн албан хаагчийн үйл ажиллагаа үйл ажиллагаа баримтлах зарчмыг захирал С.Энхтуяа нь мөрддөггүй.

4. Хүүхдийн хоолны мөнгөнөөс 610.000 төгрөгийг “Номин” худалдааны төврүү шилжүүлж, тухайн мөнгөөр БНСУ-аас ирсэн зочид төлөөлөгчдийг дайлах зорилгоор архи, шар айраг, ус, ундаа тоорт зэргийг авч, баримтыг нь хүүхдэд хэрэгтэй зүйл авсан мэтээр хуурамчаар үйлдсэн.

5.Сургуулийн завсарын 2.120.000 төгрөгийг “Тансаг обой” ХХК руу шилжүүлж, сургуулийн үүдний плитаг хийж, үлдэгдэл мөнгийг нь удирдлагууд нь өөрөө завшиж, бас л хуурамч баримт бүрдүүлсэн.

6. Зуны амралтаар хүүхдийн хоолны үлдэгдэл мах, үхрийн гуя, үхрийн өвчүүг захирал С.Энхтуяа өөр авч явсан ба оны эцсийн тооллогоор уг махны тооцоо дутаж байсан.

7.Авьяас хөтөлбөрийн багш нарт олгогдох ёстой цалинг багш нараас бэлнээр буцаан авч зориулалтын бусаар ашигласан.

8.Каритас Чех ТББ-ын хандивын брайль 2 ширхэг машин, “Дэмжинэ” ТББ-аас ирсэн брайль цаас 25 боодлыг “Тэргүүн ван” ХХК-иас худалдан авсан болгож, нийт 4.030.000 төгрөгийг бэлнээр гаргуулан удирдлага нь өөрөө завшсан.

9. Каритас Чех ТББ-ын хандиваар ирсэн хөлний массажер, ус буцалгагч зэргийг захирал С.Энхтуяа өөрөө авч явсан нь төсөл хэрэгжүүлэгч байгууллагын харааны бэрхшээлтэй хүүхдүүдэд хэрэглэх төслийн зорилгыг гуйвуулж, өөрөө завшсан.

10. Коика олон улсын байгууллагаас 13 иж бүрэн компьютер хандивласнаас 12 ширхэгийг нь орлогод авч, нэг ширхэг иж бүрэн компьютерийг эдвэрхий гэж хэлэн өөрийн гэрлүүгээ авч явсан.

11. Төрийн байгууллагын газрын хууль тогтоомжийг үл тоон сургуулийн хашаанд 7 контейнер тавьж, түрээсийн төлбөрийг няраваар дамжуулан авч, өөрийн дураар захиран зарцуулдаг.

12.Хүүхдийн сурах орчинг бүрдүүлэх зорилгоор Номин худалдааны төв рүү 999.998 төгрөгийн 2 ширхэг 32 инчийн телевизор авна гэж шилжүүлээд 21 инчийн телевизор 2 ширхэгийг авч 640.000 төгрөгийг авч, үлдэгдэл мөнгийг өөрөө дур мэдэн захиран зарцуулсан зэрэг багагүй “но” илэрчээ.

Юутай уг сургуульд ажиллаж байгаад бодит байдалтай эвлэрч чадахгүй гарсан зарим ажилчид өдгөө АТГ, ХЭҮК-т дээрх асуудлуудаар хандаад байгаа юм.

Ер нь хараагүй хүүхдүүдийг ийн хөдөлмөрийн мөлжлөг оруулж, хувьдаа мөнгө завшиж байна гэдэг шударга бус зүйл.  Тиймээс ч энэ байдлыг эсэргүүцсэн зарим иргэд, хөгжлийн бэрхшээлтэй хүмүүс уг сургуулийн гадна жагсах, эсэргүүцлээ илэрхийлж эхлэх талаар шум тараад байна.