Хэрэглэгчийн эрхийг хамгаалах хэлтсийн дарга Ч.Батбаатараас ШӨХТГ-т ирж буй гомдол, саналын талаар цөөн хором ярилцлаа.

-Нийгмийн даатгалтай холбоотой гомдол, саналууд ирж байгаа гэсэн. Энэ талаар?
-Иргэд хувийн эмнэлгүүд нийгмийн даатгалын хөнгөлөлт үзүүлдэг гэсэн мөртлөө мөнгө аваад байна. Мөн бид нийгмийн даатгал төлдөг хэрнээ заавал улсын байгууллагаар үйлчлүүлэх хэрэгтэй гэж үү гэх мэт гомдлуудыг өгч байгаа. Тиймээс манайхаас нийгмийн даатгалын хөнгөлөлт үзүүлэх ёстой хувийн эмнэлгүүдийн судалгааг гаргасан.  Улмаар нийслэл хотод 79 хувийн эмнэлэг хөнгөлөлттэй үйлчилгээ үзүүлж улсаас мөнгө авдаг байсан байгаа юм. Хөдөө орон нутагт мөн ялгаагүй 70 гаруй эмнэлэг хөнгөлөлтэй үйлчилгээ үзүүлнэ хэмээн улсаас төсөв гаргуулдаг байсныг судалгаагаар гаргаж ирсэн. Тэгэхээр иргэд нийслэлд 79 хувийн эмнэлгээр нийгмийн даатгалын хөнгөлөлттэй үйлчлүүлэх эрхтэй гэсэн үг.

-Барилгын метр квадратын асуудал юу болж байна. Хохирогчдын тоо нэмэгдсээр байна уу?
-Манай хэрэглэгчийн эрхийг хамгаалах хэлтэс маань хэрэглэгчийнхээ хохирлыг барагдуулах, хуулийн дагуу олгосон эрхээ хэрэгжүүлэх үндсэн зорилготой хэлтэс байгаа. Энэ үүргийнхээ дагуу иргэдээс метр квадрат дутуу бичиж, илүү мөнгө авч байгаа барилгын компаниудад томоохон хариуцлагын асуудлууд яригдаж байгаа. Мөн метр квадраттай холбогдолтой хохирлыг иргэдэд  буцаан төлүүлж байгаа. Тэгвэл энэхүү хохирлыг иргэдэд барагдуулахгүй байгаа гурван бий. Тодруулбал, “Тайгам Алтай” , “MD TOP”, “Тиктоник” зэрэг компани иргэдийн хохирлыг төлөөгүй учир тус бүр 10 сая төгрөгний торгууль ноогдуулсан. Тэгвэл торгууль ноогдуулсаны дараа 10 хоногт төлж барагдуулаагүй бол шүүхээс шийддэг учиртай.

Гэтэл Хан-Уул дүүргийн Н.Тунгалагтамир гэдэг шүүгч улсын байцаагчийн албан шаардлагыг баталгаажуулчихаад, дараа нь “Тайгам Алтай” компаниас энэхүү захирамжийг хүчингүй болгож өгөөч гэж хүссэний дагуу өөрийн гаргасан захирамжаа хүчингүй болгосон байгаа. Тэгэхээр бидний  тавьсан торгуулийн асуудал зогсож байна гэсэн үг.

-“Тектокник” компанийн асуудал юу болсон бэ?
-Бид хуулийн дагуу энэ компанид торуулиа тавьсан. Энэ торгуулийг маань эсэргүүцэж Захиргааны хэргийн шүүхэд өргөдөл гаргасан.  Ер  нь шүүгч нар бидний шийдвэрийг хууль бусаар дүгнэж, иргэдэд хохирол учруулж байна. Тиймээс бид эдгээр шүүгчдийн ШЕЗ-д гомдол мэдүүлж, шүүгчийн ёс зүйн талаар гомдол гаргах гэж байна.

-Барилгын компаниудын хэчнээн нь иргэдийн хохирлыг барагдуулсан бэ?
-50 орчим компаниас 26 нь иргэдийн хохирлыг барагдуулсан байгаа. 500 гаруй иргэд 3 тэрбум төгрөгөөр хохирсон. Бид цагдаагийн байгууллагад хандсан. Энэ асуудал залилангийн хэрэг мөн эсэхийг шалгуулсан. Гэвч цагдаагийн байгууллагаас шалгах үндэслэлгүй гэсэн.
Мөн Татварын ерөнхий газрыг цагдаагийн байгууллагаар шалгуулахаар болоод байгаа. Учир нь дээрх гурван компани иргэдээс мөнгө авахдаа хувийн дансруугаа шилжүүлсэн гэх баримттай ирсэн.

-Томоохон компаниуд барилгын метр квадрат дутаасан асуудалтай байгааг танай байгууллагаас нуун дарагдуулсан гэж яригдаад байгаа. Тухайлбал “Хурд” компанийн талаар цөөнгүй гомдол ирж байгаа гэсэн?
-Тухайлбал, “Хурд” грүпп тухайн компаниудтай адилхан олон арван орон сууц барьсан байгаа.  Тиймээс эдгээр орон сууц захиалагчдаас нь 12-13 өргөдөл, гомдол ирсэн.  Харин “Хурд” компани хохирсон иргэдийнхээ хохирлыг барагдуулж, ярилцлаж тохиролцсон байгаа.  Бид хохирлоо төлөөд, зөрчлөө арилгаад явж байгаа газруудыг заавал нэрлэх шаардлагагүй гэж үзэж байгаа.